Rossiyada bir necha oydan buyon o‘rmonda otasi bilan yashayotgan o‘zbek bola topilgan. Ma’lumotlarga ko‘ra, Moskva viloyatidagi Balashixa o‘rmonidan topilgan Maugli laqabli bolaga tug‘ilganlik to‘g‘risidagi guvohnoma berilgan. Bu haqda ushbu hududdagi bolalar huquqlari bo‘yicha vakil Kseniya Mishonovaga tayanib, “Xalq so‘zi Online” xabar qildi.
“Kun yaxshi yangilik bilan yakuniga yetyapti. Balashixa o‘rmonida yashagan Amal ismli bolakayimiz bugun ikkinchi marta otasini topdi. Bolada hujjatlar bo‘lmagani uchun uning tug‘ilganlik to‘g‘risidagi guvohnomasiga otasini qayd etish uchun sud qarorini kutish kerak edi.
DNK tahlili, hujjatlarni yig‘ish va qayta tiklash, majburiy ayriliq ortda qoldi. Oldinda uzoq va baxtli hayot turibdi deya umid qilamiz. Endi hammasi yaxshi bo‘ladi”, — deb yozadi Ombudsman.
Gap shundaki, sud bola bilan birga yashayotgan odam uning haqiqiy otasi ekanligini tasdiqlagan. Mazkur qaror DNK-test asosida tasdiqlandi va buning uchun zarur hujjatlar to‘plandi.
Bu ishga O‘zbekistonning Rossiyadagi elchixonasi ham hissa qo‘shdi. Tez orada erkakka vatanga qaytish to‘g‘risida sertifikat berilishi kutilyapti.
Avvalroq Rossiyaning beshta shahrida O‘zbekiston fuqarolari uchun bepul rus tili kurslari ochilgani hamda Rossiyadagi o‘zbek muhojirining 3 yoshli farzandi 6-qavatdan qulab tushib halok bo‘lgani xabar qilingandi.
Izoh (0)