АҚШ Соғлиқни сақлаш ва ижтимоий хизматлар вазирлиги АҚШ умумий хизматлар бошқармаси демократлардан номзод Жо Байденнинг президент сайловларидаги ғалабаси ҳақида расман маълум қилмагунича, унинг жамоаси билан ишламайди. Бу ҳақда вазирлик раҳбари Алекс Азар маълум қилди, деб ёзади «РБК».
«АҚШ умумий хизматлар бошқармаси қарор қабул қилганидан кейин ваколатларнинг тўлиқ, биргаликда ва профессионал тарзда топширилишини таъминлашимизни аниқ-равшан айтдик. Биз йўриқномага амал қиламиз», — деди Азар.
Аввалроқ демократ конгрессменлар Адам Шифф ва Эрик Суолуэлл АҚШ умумий хизматлар бошқармаси раҳбари Эмили Мёрфини Байденнинг ғалабасини тан олишни кечиктириш орқали одамларнинг ҳаётини хавф остига қўйишда айблаган эди.
«Агар идора Байденнинг ғалабасини тан олса, ҳокимиятни топшириш жараёни бошланади. Бу Байденнинг коронавирус пандемиясига қарши курашга тайёрланиши учун зарурдир», — деди Суолуэлл.
Амалдаги АҚШ президенти Дональд Трамп ваколатларни топширишдан бош тортса, янада кўпроқ ўлимлар келиб чиқиши ҳақида Байденнинг ўзи ҳам айтган эди. Унинг сўзларига кўра, агар ҳокимият топширилишини 20 январгача кутадиган бўлса, АҚШ яна бир ярим ой йўқотади. «Координация ҳозир ёки иложи борича тезроқ бўлиши муҳимдир», — деди Байден.
АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади. У сайловлар қонунбузарликлар билан ўтган деган фикрда, шунингдек, сайловларда мамлакат Конституцияси бузилганини айтган.
Изоҳ (0)