Rossiya prezidenti Vladimir Putin Mudofaa vazirligiga Sudan Respublikasi bilan ushbu mamlakatda Rossiya Harbiy dengiz flotining moddiy-texnik ta’minot punktini tashkil etish haqida bitim imzolashni buyurdi, deb yozadi Meduza.
Avvalroq Rossiya hukumati Rossiya va Sudan o‘rtasidagi tegishli kelishuv loyihasini ma’qullagan edi. “TASS” qayd etishicha, hujjat oldindan Sudan hukumati bilan birgalikda ishlab chiqilgan.
Kelishuv loyihasi Sudanning Rossiya harbiy obyekti uchun beg‘araz yer taqdim etishini ko‘zda tutadi. Harbiy dengiz flotining moddiy-texnik ta’minot punktida ko‘pi bilan 300 nafar Rossiya harbiylari xizmat qiladi, punktning o‘zida bir vaqtda to‘rtta harbiy kema, shu jumladan, yadro-energetik qurilmali kemalar ham bo‘la oladi.
Sudan tadbirkor Yevgeniy Prigojinning biznes-manfaatlari sohasiga kiradi, u esa Rossiya hukumatiga yaqin odam hisoblanadi. Amerika hukumati ma’lumotlariga ko‘ra, Prigojin Sudanda norozilik namoyishlarini bostirish bo‘yicha operatsiya o‘tkazgan. “Novaya gazeta” nashri Prigojinning “Vagner” xususiy harbiy kompaniyasi jangchilari bilan Sudanga uchgani haqida yozgan, ammo biznesmenning o‘zi buni rad etgan edi.
Mudofaa vazirligi 2018-yil dekabrida ma’lum qilganidek, Rossiyaning oltita harbiy bazasi bor, bular — Suriya, Abxaziya, Janubiy Osetiya, Armaniston, Tojikiston va Qirg‘izistonda.
Izoh (0)