Россия президенти Владимир Путин Мудофаа вазирлигига Судан Республикаси билан ушбу мамлакатда Россия Ҳарбий денгиз флотининг моддий-техник таъминот пунктини ташкил этиш ҳақида битим имзолашни буюрди, деб ёзади Meduza.
Аввалроқ Россия ҳукумати Россия ва Судан ўртасидаги тегишли келишув лойиҳасини маъқуллаган эди. «ТАСС» қайд этишича, ҳужжат олдиндан Судан ҳукумати билан биргаликда ишлаб чиқилган.
Келишув лойиҳаси Суданнинг Россия ҳарбий объекти учун беғараз ер тақдим этишини кўзда тутади. Ҳарбий денгиз флотининг моддий-техник таъминот пунктида кўпи билан 300 нафар Россия ҳарбийлари хизмат қилади, пунктнинг ўзида бир вақтда тўртта ҳарбий кема, шу жумладан, ядро-энергетик қурилмали кемалар ҳам бўла олади.
Судан тадбиркор Евгений Пригожиннинг бизнес-манфаатлари соҳасига киради, у эса Россия ҳукуматига яқин одам ҳисобланади. Америка ҳукумати маълумотларига кўра, Пригожин Суданда норозилик намойишларини бостириш бўйича операция ўтказган. «Новая газета» нашри Пригожиннинг «Вагнер» хусусий ҳарбий компанияси жангчилари билан Суданга учгани ҳақида ёзган, аммо бизнесменнинг ўзи буни рад этган эди.
Мудофаа вазирлиги 2018 йил декабрида маълум қилганидек, Россиянинг олтита ҳарбий базаси бор, булар — Сурия, Абхазия, Жанубий Осетия, Арманистон, Тожикистон ва Қирғизистонда.
Изоҳ (0)