Donald Tramp o‘z ma’muriyati bilan Erondagi uranni boyitish zavodiga ehtimoliy hujumni muhokama qilgan. Bu haqda The New York Times sobiq va amaldagi amerikalik mansabdorlar orasidagi to‘rtta manbasiga tayanib xabar berdi, deb yozadi Meduza.
Hujum g‘oyasi muhokama qilingan majlis Oq uyda 12-noyabr kuni — MAGATE nazoratchilari Eron yadro dasturining asosiy obyekti Natanzda uran zaxiralari faol ravishda yetishtirilayotgani va ular allaqachon yadro kelishuvida ko‘zda tutilgan hajmdan 12 barobar oshib ketganini ma’lum qilganidan keyin o‘tkazilgan.
Manbalarga ko‘ra, AQShning amaldagi rahbari Natanzdagi zavodga aviahujum yoki kiberhujum uyushtirish variantlarini ko‘rib chiqishni taklif qilgan, ammo vitse-prezident Maykl Pens, davlat kotibi Maykl Pompeo, mudofaa vaziri vazifasini bajaruvchi Kristofer Miller va Qurolli kuchlar shtab boshliqlari qo‘mitasi raisi Mark Milli Trampni bu qadamni bosishdan qaytargan. Prezident maslahatchilari bunday xatti-harakatlar Yaqin Sharqda katta ko‘lamli harbiy nizoga olib kelishi mumkinligini aytgan.
Gazetada qayd etilishicha, o‘zining AQSh prezidenti lavozimidagi so‘nggi kunlarida Donald Tramp Eron bilan aloqalarni yomonlashtirishda va davlatlarga qarshi sanksiyalar kiritishda davom etmoqda, buni u o‘z davomchisi Jo Baydenga Tehron bilan yadro bitimini qayta tiklash qiyinroq bo‘lishi uchun qilmoqda (undan Vashington 2018-yilda chiqqan).
Eslatib o‘tamiz, AQShda prezident saylovi 2020-yil 3-noyabrda bo‘lib o‘tdi. 15-noyabr holatiga ko‘ra, natijalar hali rasman e’lon qilinmadi. Amerika OAVlari Demokratlar partiyasidan nomzod Jo Baydenni g‘olib deb topdi, Tramp saylovdagi mag‘lubiyatini hali ham rasman tan olmagan. Bayden uning mag‘lubiyatini tan olishdan bosh tortishini sharmandalik deb atadi.
AQShdagi prezidentlik saylovida berilgan ovozlarni hisoblash hali yakunlanmagan va g‘olib rasman e’lon qilinmagan.
Izoh (0)