Ozarbayjon Qorabog‘dagi vayronagarchilik uchun Armanistondan kompensatsiya talab qiladi

Ozarbayjon prezidenti Ilhom Aliyev Boku xalqaro sudlar orqali Tog‘li Qorabog‘dagi vayron qilingan uylar va infratuzulma uchun Yerevandan kompensatsiya talab qilishini aytdi. U bu haqda Ozarbayjon nazoratiga o‘tgan Fizuli va Jabroil tumanlariga tashrifi vaqtida ma’lum qilgan, deb xabar beradi “Kommersant”.

Aliyevning ta’kidlashicha, Jabroilda birorta butun bino qolmagan. Maktablar, uylar va boshqa obyektlar vayron qilingan. Uning so‘zlariga ko‘ra, Ozarbayjon yoqib yuborilgan uylar uchun ham kompensatsiya talab qiladi.

 

View this post on Instagram

 

A post shared by Mehriban Aliyeva (@firstvicepresidentazerbaijan)

“Dushman taraf butun infratuzilmani yakson qildi. Ular bunga xalqaro sudda javob beradi. Oldin ham aytganman va yana qaytaraman, xalqaro tuzilmalar, ekspertlar jalb qilinib, yetkazilgan zarar hisoblanadi va biz 30 yil uchun kompensatsiya talab qilamiz. Shu kunlarda ular Kelbejarni, uylarni, o‘rmonlarni yakson qildi. Buning uchun ham ular javob beradi”, — deydi Aliyev.

 

Avvalroq Tog‘li Qorabog‘dagi Ozarbayjon nazorati ostiga o‘tadigan ba’zi hududlarda armanlar o‘z uylarini yoqib yuborayotgani to‘g‘risida xabar berilgandi.

Eslatib o‘tamiz, 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Hujjatga ko‘ra, Boku va Yerevan egallab turgan pozitsiyalarida to‘xtab, Tog‘li Qorabog‘ hududining bir qismi, shu jumladan, strategik jihatdan muhim Shusha shahri Ozarbayjonga o‘tadi. Shartlarda aytilishicha, Armaniston 20-noyabrgacha Agdam va Kalbajar tumanlarini, 1-dekabrga qadar Lachinni Ozarbayjonga qaytarishi kerak. Shuningdek, kelishuv mintaqaga Rossiya tinchlikparvar kuchlarini kiritishni nazarda tutadi.