AQShda eng kam ish haqi soatiga 15 dollargacha ko‘tariladi. Bu haqda Amerika OAVlari tomonidan prezident saylovlari g‘olibi deb atalayotgan AQSh Demokratik partiyasi nomzodi Jo Bayden Twitter’da ma’lum qildi, deb yozadi “RBK”.
Uning so‘zlariga ko‘ra, mamlakat koronavirus pandemiyasi oqibatida yuzaga kelgan inqirozdan keyin qayta tiklana boshlaganida soatbay ish haqi oshiriladi. “Biz buni balandroq ish haqi, shu jumladan, 15 dollarlik eng kam ish haqi, yaxshiroq imtiyozlar va kuchliroq kollektiv shartnomalar bilan amalga oshiramiz, bular sizlarga oilangizni ta’minlashga yordam beradi”, — deb yozdi Bayden.
Uning ta’kidlashicha, bularning barchasi Amerika o‘rta sinfini qaytarish va uni har qachongidan yaxshiroq qilish imkonini beradi.
AQSh mehnat vazirligi tomonidan o‘rnatilgan eng kam ish haqi hozir soatiga 7,25 dollarga teng. Ammo ko‘plab shtatlarda eng kam ish haqida bundan ancha baland. Vashington shtatida pastki chegara soatiga 13,5 dollar, Massachusetsda — 12,75 dollar etib belgilangan. Amerikaning yana bir qator shtatlari — Men, Konnektikut, Kolorado, Arizona, Kaliforniya, Oregonda eng kam ish haqi soatiga 12 dollar.
Ayni paytda ba’zi shtatlarda — Jorjiya va Vayomingda bu raqam federal minimumdan pastroq, Amerika Samoasida esa ish haqining maxsus minimal stavkalari amal qiladi.
Ish haqining eng kam miqdorini oshirish Baydenning saylovoldi kampaniyasining asosiy bandlaridan biri edi. Amaldagi prezident Donald Tramp bilan 22-oktabrda o‘tkazilgan munozaralarda demokrat soatbay ish haqining minimal stavkasini 15 dollargacha ko‘tarish COVID-19 pandemiyasi tufayli muammolarga uchragan kichik biznesni qo‘llab-quvvatlash usullaridan biri deb aytgan edi.
Tramp bunga javoban eng kam ish haqining oshirilishi ko‘plab korxonalarni yopilishga yoki xodimlarining katta qismini ishdan haydashga majbur qilishini aytgandi. Shu bilan birga, u ikkinchi muddatga saylansa, eng kam ish haqini oshirish imkoniyatini ko‘rib chiqishga va’da bergan edi.
Izoh (0)