Ozarbayjon Qorabog‘dagi urushda qancha tinch aholi vakili halok bo‘lganini oshkor qildi
Tog‘li Qorabog‘ hududi uchun Ozarbayjon hamda Armaniston o‘rtasida sodir bo‘lgan qurolli to‘qnashuvlar oqibatida 94 nafar ozarbayjonlik tinch aholi vakillari halok bo‘lgan. Bu haqda mamlakat bosh prokuraturasi ma’lum qilgan, deb yozmoqda “Korrespondent.net”.
“Armaniston qurolli kuchlarining o‘t ochishi oqibatida 27-sentabrdan bugungi kunga qadar 94 nafar fuqaro hayotdan ko‘z yumgan, yana 414 nafar tinch aholi vakillari turli darajadagi tan jarohatlari olgan”, — deyiladi prokuratura ma’lumotida.
Shuningdek, qurolli harakatlari sabab 120 ta ko‘p xonadonli turar joyga, 3410 ta shaxsiy xonadon va yana 512 ta fuqarolik obyektiga zarar yetgani aytildi.
Avvalroq Armaniston Sog‘liqni saqlash vazirligi 2317 nafar harbiyning jasadlari Ozarbayjon tomoni bilan almashilgani va almashuvlar davom etayotganini bildirgan.
Rossiya prezidenti Vladimir Putin eslakatsiya oqibatida 4 mingga yaqin kishi halok bo‘lgani, yana 8 ming nafar odam turli darajadagi tan jarohatlari olganini ma’lum qilgan.
Eslatib o‘tmiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Hujjatga ko‘ra, Boku va Yerevan egallab turgan pozitsiyalarida to‘xtab, Tog‘li Qorabog‘ hududining bir qismi, shu jumladan, strategik jihatdan muhim Shusha shahri Ozarbayjonga o‘tadi. Shartlarda aytilishicha, Armaniston 20-noyabrgacha Agdam va Kalbajar tumanlarini, 1-dekabrga qadar Lachinni Ozarbayjonga qaytarishi kerak edi. Shuningdek, kelishuv mintaqaga Rossiya tinchlikparvar kuchlarini kiritishni nazarda tutadi. Nizoni tartibga solishda boshqa mamlakatlardan tinchlikparvar kuchlarning ishtirokini o‘sha vaqtda Moskva rad etgan edi.
Armaniston mudofaa vazirligi harbiy adovat tugashining sabablarini tushuntirayotib, Boku Anqaradan harbiy yordam olganini, Yerevanga esa oldingi pozitsiyadagilarning rotatsiyasini ta’minlash uchun harbiylar yetishmaganini ma’lum qilgandi. Nizo chog‘ida Armaniston tomoni urushda Turkiya maxsus bo‘linmalari qatnashganini bir necha marta aytgandi.Turkiyadan yollanma qo‘shinlar Qorabog‘ga yuborilgani haqida The Wall Street Journal ham Suriyadagi manbalariga tayanib xabar bergandi. Boku va Anqara buni rad etgan.
Kelishuv imzolangan bir paytda Yerevanda norozilik namoyishlari va tartibsizliklar boshlandi. Ularning ishtirokchilari Pashinyanni iste’foga chiqishga chaqirdi. Muxolifat yetakchilarining ba’zilari qo‘lga olindi va ularga nisbatan jinoyat ishlari qo‘zg‘atildi.
