Озарбайжон Қорабоғдаги вайронагарчилик учун Арманистондан компенсация талаб қилади

Озарбайжон президенти Илҳом Алиев Боку халқаро судлар орқали Тоғли Қорабоғдаги вайрон қилинган уйлар ва инфратузулма учун Еревандан компенсация талаб қилишини айтди. У бу ҳақда Озарбайжон назоратига ўтган Физули ва Жаброил туманларига ташрифи вақтида маълум қилган, деб хабар беради «Коммерсантъ».

Алиевнинг таъкидлашича, Жаброилда бирорта бутун бино қолмаган. Мактаблар, уйлар ва бошқа объектлар вайрон қилинган. Унинг сўзларига кўра, Озарбайжон ёқиб юборилган уйлар учун ҳам компенсация талаб қилади.

«Душман тараф бутун инфратузилмани яксон қилди. Улар бунга халқаро судда жавоб беради. Олдин ҳам айтганман ва яна қайтараман, халқаро тузилмалар, экспертлар жалб қилиниб, етказилган зарар ҳисобланади ва биз 30 йил учун компенсация талаб қиламиз. Шу кунларда улар Келбежарни, уйларни, ўрмонларни яксон қилди. Бунинг учун ҳам улар жавоб беради», — дейди Алиев.

View this post on Instagram

A post shared by Mehriban Aliyeva (@firstvicepresidentazerbaijan)

Аввалроқ Тоғли Қорабоғдаги Озарбайжон назорати остига ўтадиган баъзи ҳудудларда арманлар ўз уйларини ёқиб юбораётгани тўғрисида хабар берилганди.

Эслатиб ўтамиз, 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Ҳужжатга кўра, Боку ва Ереван эгаллаб турган позицияларида тўхтаб, Тоғли Қорабоғ ҳудудининг бир қисми, шу жумладан, стратегик жиҳатдан муҳим Шуша шаҳри Озарбайжонга ўтади. Шартларда айтилишича, Арманистон 20 ноябргача Агдам ва Калбажар туманларини, 1 декабрга қадар Лачинни Озарбайжонга қайтариши керак. Шунингдек, келишув минтақага Россия тинчликпарвар кучларини киритишни назарда тутади.