Rossiyaning Ivanovsk viloyatida COVID-19 koronavirus infeksiyasi asoratlari oqibatida vafot etgan bemorlarning murdalari joylashtiriladigan o‘likxonalar to‘lib ketdi. Bu haqda hudud sog‘liqni saqlash departamenti rahbari Artur Fokinga tayanib “RIA Novosti” xabar bergan.
“Yuklama sezilarli darajada oshgan, shu sababli qo‘shimcha muzlatish kameralarini izlayapmiz. O‘likxonalar jasadlarni qarindoshlariga topshirgungacha bo‘lgan oraliqdagi yuklama dosh bera olmayapti”, — degan Fokin.
Departament vakilining so‘zlariga ko‘ra, bunday vaziyatning yuzaga kelishiga vafot etgan kishilarning qarindoshlari tomonidan jasadlarni olib ketish ishlari sekin kechayotgani sabab bo‘lgan. Ular murdalarni olib ketmayotgani tufayli ‘“morglar”ning o‘tkazuvchanligi kamaymoqda.
Oktabr oxirida Kemerovo viloyati hukumati ham o‘likxonalarning jasadlarga to‘lib ketganini bildirgan. Ularning tushuntirishida ham vafot etgan bemorlarning qarindoshlari dafn marosimlarini o‘tkazish uchun murdalarni olib ketishga shoshilmayotgani qayd etilgan. Bir necha hafta avval Oltoy respublikasida ham o‘likxonalarning bemorlar murdalariga to‘lib ketgani xabar qilingan.
Ivanovsk viloyati Rossiyada koronavirusga qarshi kurash federal shtabi berib borayotgan ma’lumotlarga ko‘ra COVID-19’ga chalinish holatlari eng ko‘p uchrayotgan hududlarga kirmaydi. 16-noyabr holatiga ko‘ra, ortda qolgan bir sutka ichida viloyatda 149 ta yangi kasallanish holati qayd etilgan, Rossiya miqyosida esa jami 22 778 ta kasallanish holatlari aniqlanib yangi antirekord o‘rnatilgan.Mavzuga doir: Rossiyada “samoizolyatsiya” 2020-yil so‘zi deb topildi
Izoh (0)