Qozog‘iston prezidenti Qosim-Jo‘mart To‘qayev mamlakatda koronavirusga oid statistikani yashirmaslikka chaqirdi. Bu haqda 16-noyabr kuni hukumat a’zolari, qator davlat organlari rahbarlari, shahar va viloyat hokimlari bilan o‘tkazilgan yig‘ilishda so‘z borgan.
“Infeksiyaga chalinganlarning maksimal hisobi — bu virusga qarshi kurashning mutlaqo talabi”, — deydi Qozog‘iston rahbari. Uning ma’lum qilishicha, mamlakatning qator viloyatlarida koronavirus bilan kasallanish faktlari yashirilgani aniqlangan.
“O‘zimiz xohlagan narsamizni haqiqat deya talqin qilish — juda xavfli ekanligini tushunishimiz kerak, chunki u haqiqiy xavf borasidagi tasavvurni buzib ko‘rsatadi, shuningdek, butun mamlakat ko‘lami bo‘ylab koronavirus infeksiyasiga qarshi kurash strategiyasiga zid. Vaziyat to‘g‘ri baholanmayapti, kerakli choralar oxirigacha amalga oshirilmagan, fuqarolar orasida epidemiologik xavfdan ogohlik tushib ketyapti. Bu endilikda shu kabi tendensiya kuzatilayotgan dunyoning ko‘plab davlatlarida aksiyomaga aylandi. Tan olish kerakki, mazkur muammo bizning sog‘liqni saqlash tizimimizda ham surunkali xarakterga aylandi”, — deydi To‘qayev.
Mamlakat rahbari, shuningdek, tibbiyot tashkilotlarining yetarli darajada tayyor emasligini ta’kidlagan: “Kasalxonalarni to‘liq himoyalash ishlari amalga oshirilmagan, shu sababli bemor va shifokorlarning kasallanish xavfi saqlanib qolmoqda. Deyarli barcha hududlarda reanimatsiya bo‘linmalari to‘liq jihozlanmagani kuzatilmoqda. Xususan, koronavirus infeksiyasiga chalingan og‘ir bemorlarni davolashda kerak bo‘ladigan alohida dori va tibbiyot vositalarining yetishmovchiligi kuzatilmoqda. Viloyatlar o‘zidan kelib chiqib dori vositalarini xarid qilmoqda, mavjud davolash protokollarini inobatga olmayapti”.
Qozog‘iston prezidenti davlat koronavirusga qarshi kurashga jalb etilgan tibbiyot xodimlariga ustama pullarini to‘lashni davom etishini ma’lum qilgan. Shuningdek, u hukumatga “korrupsiya urchigan barcha potensial hududlarni qattiq nazorat ostiga olish” bo‘yicha topshiriq bergan.
Eslatib o‘tamiz, iyul oyida ham Qozog‘iston prezidenti pandemiyaga oid statistikani yashirmaslikka chaqirgandi. So‘nggi ma’lumotlarga ko‘ra, Qozog‘istonda koronavirusga chalinganlar soni 121 ming kishidan oshgan, 1952 nafar bermor COVID-19 qurboniga aylangan.
Izoh (0)