Rossiya prezidenti Vladimir Putin Mayya Sanduni Moldova prezidenti saylovlaridagi g‘alabasi bilan tabrikladi, deb yozadi “RBK” Kreml matbuot xizmatiga tayanib.
“Sizning davlat rahbari lavozimidagi faoliyatingiz mamlakatlarimiz o‘rtasidagi aloqalarning konstruktiv rivojlanishiga imkoniyat yaratishiga umid qilaman”, — deyiladi Rossiya yetakchisining tabrik telegrammasida.
Shuningdek, Moldovaning amaldagi prezidenti Igor Dodon ham “Harakat va birdamlik” partiyasi yetakchisi Mayya Sanduni g‘alaba bilan qutladi.
“Dastlabki natijalarga ko‘ra, mening raqibim Mayya Sandu g‘alaba qozondi. Bunda gap dastlabki natijalar haqida bormoqda. Va men uni bu bilan tabriklamoqchiman”, — dedi Dodon brifingda.
Eslatib o‘tamiz, Moldovada o‘tkazilgan prezidentlik saylovlarining ikkinchi turida 97,29 foiz byulletenlar hisobi bo‘yicha 54,04 foiz ovoz bilan mamlakat sobiq bosh vaziri va “Harakat va birdamlik” muxolifat partiyasi yetakchisi Mayya Sandu g‘oliblikni qo‘lga kiritmoqda. Moldovaning amaldagi prezidenti Igor Dodon taxminan 45,97 foiz ovoz to‘plagan.
Ovozlarning qariyb 100 foizi hisoblab chiqilganidan keyin esa, MSK ma’lumotlari bo‘yicha, Sandu ovozlarning 57,74 foizini, amaldagi prezident — 42,26 foizini qo‘lga kiritgan. Saylovda saylovchilarning 50 foizdan ziyodi qatnashgan.
Sandu Yevropa ittifoqi bilan integratsiya, Ruminiya va Ukraina bilan munosabatlarni yaxshilash tarafdori. Shuningdek, u Pridnestrovyedagi nizo hududidan Rossiya harbiylari olib chiqib ketilishini qo‘llab-quvvatlamoqda.
Moldovada prezidentlik saylovlarining birinchi turi 2020-yil 1-noyabr kuni bo‘lib o‘tgan. Unda Dodon 32,74 foiz natija bilan Sandudan ortda qolgan edi (unda 35,96 foiz ovoz).
Moldovada prezidentlik saylovlarini o‘tkazish 2019-yilning iyunida respublikaning Konstitutsiyaviy sudi Dodonni deputatlar so‘rovi bo‘yicha lavozimidan chetlashtirgach belgilangan edi. Bu 2016-yili Dodon prezident etib saylanganidan buyon oltinchi marotaba chetlashtirish hisoblanadi.
Izoh (0)