Россиялик иммунолог: «Ҳамма одамлар бир вақтда ўз уйларига қамаб қўйилса, эпидемия икки ҳафтада тугайди»

Россиялик шифокор-иммунолог Владимир Болибок COVID-19 пандемиясини тўхтатишнинг самарали усулини айтди, деб хабар бермоқда «РБК».

Эпидемиология бўйича ҳар қандай дарсликда ёзилган: агар сиз инфекцияга чалинганларни ажратиб, кескин карантинга ўтқизсангиз, эпидемия тугайди. Чунки вирус организмда абадий яшамайди. Ёки организм вирус билан бирга нобуд бўлади, ёки вирус ўлиб, организм соғаяди. Шу билан вируснинг тарқалиш занжири тўхтайди. Агар сиз бир вақтнинг ўзида барча одамларни ҳеч ким ҳеч қаерга кетмаслиги учун ўзларининг уйларига қамаб қўйсангиз, эпидемия 2 ҳафта ичида тугайди», — деган Владимир Болибок Sputnik радиосига берган интерюсида.

Иммунологнинг фикрича, айнан шу схема бўйича қатъий иш юритгани учун Хитой, Тайван, Жанубий Корея ва Вьетнам каби мамлакатлар коронавирусни тўхтата олди.

Жонс Ҳопкинс университети маълумотларига кўра, дунёда коронавирус билан касалланганлар сони 54 миллиондан ошди. ЖССТ маълумотларига кўра, 15 ноябрь куни коронавирус аниқланганлар сони 657 мингтадан ошди. Бу сўнгги ҳафта ичидаги навбатдаги рекорд кўрсаткичдир.

Шу сабабли кўплаб мамлакатларда карантин чоралари кучайтирилди. Хусусан, Австрияда 17 ноябрдан тўлиқ локдаун, Эронда 21 ноябрдан қатъий чеклов чоралари жорий қилинади.  Коронавирус сабаб Нидерландия, Франция, Швейцария ва Грузияда ҳам карантин чоралари кучайтирилган.