2017-yilda Nexia mashinasida piyodani urib, voqea joyidan qochib ketgan fuqaro oradan uch yil o‘tib, o‘z qilmishiga iqror bo‘ldi. Bu haqda “Yoshlar” kanalining “Yangi davr” dasturida ma’lum qilindi.
2017-yilning dekabr oyida Jizzax viloyatining Paxtakor tumanida istiqomat qiluvchi 1993-yilda tug‘ilgan fuqaro Nexia mashinasida G‘allaorol tumanida yashovchi tanishinikiga yo‘l olgan. Haydovchi G‘allaorol – Lalmikor yo‘lining 10-kilometriga yetganda piyodani urib yuborgan. O‘zining ma’lum qilishicha, tun qorong‘isida odam urib yuborganini dastlab bilmagan. 200 metrlar chamasi o‘tib ketib, yana ortga qaytgan va yerda yig‘lab yotgan kishini ko‘rgan. Qo‘rqib ketganidan birinchi yordam ko‘rsatish va kasalxonaga olib borish o‘rniga voqea joyidan qochib ketgan. G‘allaorol tumani “Lalmikor” mahallasida yashovchi 1982-yilda tug‘ilgan erkak esa olgan tan jarohati tufayli vafot etgan.
Haydovchi aylanma yo‘llardan foydalanib, hodisa joyini tark etgan. Shu sababli u kameralarga tushmay qolgan. U tanish ustaga itni urib yuborganini aytib, mashinasini ta’mirlatib olgan.
G‘allaorol tumani IIB tomonidan qo‘zg‘atilgan jinoyat ishining tergov natijalariga ko‘ra, ushbu YTHni sodir etgan fuqaroning shaxsiga aniqlik kiritilmagani sababli jinoyat ishi 2017-yilning 29-dekabr sanasida harakatdan to‘xtatilgan. Oradan 3 yil o‘tib haydovchining o‘zi ichki ishlar organlariga kelib, o‘z aybini tan oldi.
“Menga hech kim tazyiq o‘tkazgani yo‘q, hech kim bosim o‘tkazgani yo‘q. Vijdonim qiynalganligi sababli o‘z aybimga iqror bo‘lib, ichki ishlar xodimlariga murojaat qildim. Faqat vijdonim juda qattiq qiynalyapti”, − deydi haydovchi.
“Mazkur holat yuzasidan qonunchilikda belgilangan tartibda, ya’ni jabrlanuvchiga nisbatan birinchi yordam ko‘rsatilmaganligi va voqea joyidan yashiringanligi holati yuzasidan O‘zbekiston Respublikasi Jinoyat kodeksining tegishli moddalariga asosan jinoyat ishi qo‘zg‘atildi”, — dedi Jizzax viloyati IIB YHXB katta inspektori Erkin Ochilov.
Izoh (0)