Avtomobilni bir mil masofaga itarib borish bo‘yicha yangi jahon rekordi Finlyandiyada o‘rnatildi. Mahalliy IT-mutaxassisi Yussi Kallioni o‘zining 2,1 tonnali Saab’ida 1609,34 metrni 13 daqiqa 26 soniyada bosib o‘tib, oldingi rekordni taxminan 2 daqiqaga yangiladi, deb xabar beradi Motor.
47 yoshli Kallioni rekordni o‘rnatish uchun o‘zining shaxsiy avtomobilini tanlagan — 2006-yilda ishlab chiqarilgan Saab 9-7x. Rekordchi uning motorini o‘t oldirish natijasida chiqadigan ovoz sabab mashinaga Röhkö laqabini bergan. Bundan oldingi rekord 11 yil oldin o‘rnatilgandi: u xorvatiyalik Mario Mlinarichga tegishli bo‘lib, erkak 1,9 tonnali avtomobilni bir mil masofaga 15 daqiqa 21 soniyada itarib borgan.
Kallioni mashinani itarish jarayonini ko‘plab omillarga bog‘liq murakkab “pazl” deb atagan. Yussining so‘zlariga ko‘ra, Ginnesning rekordlar kitobiga kirish uchun qo‘pol kuch emas, balki energiyani to‘g‘ri taqsimlash imkonini beruvchi muntazam mashqlar yordam bergan.
Rekordchining ta’kidlashicha, kerakli quvvatga erishishning faqat ikkita usuli bor: o‘z kuchingni oshirish yoki qarshilikni kamaytirish. So‘nggi vazifani bajarish uchun u mashinaga ishqalanish qarshiligini kam bo‘lgan Nokian Hakkapeliitta R3 SUV pokrishkalarini “kiygizgan”.
Butun masofa davomida mutaxassislar Yussining mushaklari zo‘riqishini maxsus datchiklarga ega Myontec Oy “aqlli” kostyumi yordamida kuzatgan. Ularning ma’lumotlariga ko‘ra, mushaklar maksimal quvvatning 40 foizigagina zo‘riqqan, Yussining pulsi esa daqiqasiga 164 ga chiqqan. Shu bilan birga, mashina erishgan maksimal tezlik soatiga 10,4 kilometrni tashkil etadi. E’tiborli jihati, bunga qadar rekordchining belida jiddiy muammo kuzatilgan — u o‘tgan yilgi reabilitatsiya kurslaridan so‘ng, rekord o‘rnatish bo‘yicha o‘ylay boshlagan.
Mavzuga doir:
Izoh (0)