Namangan viloyatida Isuzu yuk mashinasi DAF yuk mashinasi bilan to‘qnashib yo‘l-transport hodisasi sodir etdi, deya xabar bermoqda IIV.
Qayd etilishicha, 10-noyabr kuni soat 04:30 larda Toshkent–O‘sh yo‘lining 269-kilometrida Isuzu avtomashinasini boshqarib ketayotgan haydovchi harakat xavfsizligini ta’minlay olmay, shu yo‘nalishda o‘zidan oldinda harakatlanib ketayotgan DAF transport vositasining orqa tomoniga borib urilgan.
Natijada Isuzu avtomashinasida bo‘lgan yo‘lovchi olgan tan jarohati oqibatida shifoxonada vafot etgan.
Ushbu holat bo‘yicha tuman IIB huzuridagi Tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Avvalroq Andijonda Isuzu bilan to‘qnashgan Labo ikkita Nexia va Damas’ni urib yuborgani, Jizzaxda 2 ta Howo haydovchisi qarama-qarshi yo‘nalishda o‘zaro hazillashishi oqibatida mashinalar bir-biri bilan to‘qnashgani hamda Zarafshonda ichida yo‘lovchilar bo‘lgan ikkita avtobus ishtirokida avariya yuz bergani haqida xabar berilgandi.
Izoh (0)