Lukashenko hokimiyatni o‘g‘illariga topshirish niyatida emasligini ma’lum qildi

Belarus prezidenti Aleksandr Lukashenko o‘g‘illarini o‘ziga voris sifatida tayyorlamayotganini ma’lum qildi. Uning so‘zlariga ko‘ra, mamlakatda hokimiyating tranziti amalga oshmaydi, masalani Belarus xalqi prezidentni saylash orqali hal etadi, deb yozadi “Kommersant”.

“O‘g‘illarimdan hech biri mendan keyin prezident bo‘lmaydi. Hech biri! Yigirma yil aniq prezident bo‘lmayman. Men qurmoqchi bo‘lgan konstruksiyadan kelib chiqadigan bo‘lsak, besh yil ham prezident bo‘lmaydigandekman”, — deydi Lukashenko.

Uning so‘zlariga ko‘ra, barchasi Belarusdagi vaziyatga bog‘liq. “U tinch, normal bo‘lsa, Konstitutsiyani qabul qilamiz, barcha bo‘g‘inlarda, barcha hukumat tuzilmalarida saylovlar o‘tkazamiz va o‘ylaymanki, bunga besh yil kerak bo‘lmaydi”, — deya Lukashenko prezidentlik lavozimiga voris tanlamayotganini qo‘shimcha qilgan. “Hukumatning tranziti bo‘lmaydi! Hech qanday vorislar. Xalq kimni tanlasa, shu bo‘ladi. Men qasam ichganman. Men Belarus xalqi qanday qarorga kelsa, shunday bo‘ladi deb va’da berganman”, — deydi Lukashenko.

Ma’lumot uchun, Belarus prezidentining uchta o‘g‘li bor. Katta o‘g‘li Viktor mamlakat Xavfsizlik kengashi a’zosi, milliy xavfsizlik bo‘yicha yordamchi, Milliy olimpiya qo‘mitasining birinchi vitse-prezidenti hisoblanadi. O‘rtancha o‘g‘li Dmitriy — “Prezident sport klubi” davlat-jamoat kengashi raisi, kenjasi Nikolay — o‘quvchi.