AQSh prezidenti Donald Tramp birinchi bor saylov yakunlari bo‘yicha shakllantiriladigan keyingi administratsiyaga o‘zi rahbarlik qilmasligi mumkinligini aytdi, deb xabar beradi “Kommersant”. Pandemiyaga qarshi kurash borasida amalga oshirilayotgan ishlar haqida gapirar ekan, u keyingi administratsiya qanaqa bo‘lishini “vaqt ko‘rsatadi” degan.
“Ideal holatda biz izolyatsiyaga kirmaymiz. Men kirmayman, hozirgi administratsiya izolyatsiyaga kirmaydi. Kelajakda ham sodir bo‘lmasligiga umid qilaman — keyingi administratsiya qanaqa bo‘lishini kim biladi? O‘ylaymanki, vaqt ko‘rsatadi. Ammo men shuni ayta olaman, hozirgi administratsiya izolyatsiyaga kirmaydi”, — deydi Tramp Oq uyda jurnalistlar bilan o‘tkazilgan brifingda. Reuters’ning yozishicha, bu Donald Tramp prezident bo‘lmasligi ehtimolini tilga olgan birinchi holat hisoblanadi.
Eslatib o‘tamiz, AQSh ommaviy axborot vositalari, xususan, Associated Press, CNN, The New York Times, ABC News, Fox News va boshqalar 7-noyabr kuni Jo Baydenni AQShning saylangan prezidenti deb e’lon qildi. Prezident saylovi 3-noyabr kuni o‘tib bo‘lgan, ammo ularning yakuniy natijalari pochta orqali ovoz berilganligi va saylovga rekord darajada ko‘p (avvalgi yillardagidan 15 millionga ko‘p) saylovchilar kelganligi tufayli kechikdi. Bayden prezident saylovida g‘olib chiqish uchun tanlovchilarning kamida 270 ta ovozi kerak bo‘lgan holatda 273 ta ovozni qo‘lga kiritgan.
AQShning amaldagi prezidenti Donald Tramp esa hozircha mag‘lubiyatini tan olishdan bosh tortdi. Tanlovchilar hay’ati prezidentni rasman 14-dekabr kuni saylaydi.
Mavzuga doir:
Izoh (0)