JSST o‘tgan bir sutka ichida dunyoda koronavirus bilan kasallanish bo‘yicha rekord ko‘rsatkichni qayd etdi

O‘tgan bir sutka ichida butun dunyo bo‘ylab yana 628 136 kishida koronavirus tasdiqlandi. Bu pandemiya boshlanganidan buyon sutka davomida qayd etilgan eng yuqori ko‘rsatkich. Infeksiyaning kunlik tarqalishi statistikasi Jahon sog‘liqni saqlash tashkilotining saytiga joylashtirib borilmoqda.

Butun dunyoda koronavirus bilan kasallanganlar soni hozirda 52,48 million kishidan oshdi.

JSST ma’lumotlariga ko‘ra, eng ko‘p kasallanish holati AQShda qayd etilgan. Mamlakatda bir sutka ichida 142 076 kishi COVID-19’ga chalingan, kasallanganlarning umumiy soni 10,2 million kishidan oshgan. Virus tarqalishini real vaqtda kuzatib kelayotgan Jons Hopkins universiteti ma’lumotlariga ko‘ra, AQShda 10,6 milliondan ortiq odamda koronavirus tasdiqlangan.

O‘tgan bir sutka ichida qayd etilgan kasallar sonining ko‘pligi bo‘yicha ikkinchi o‘rinda Braziliya ketmoqda — 48 331 bemor. Mamlakatda COVID-19’ga chalinganlarning umumiy soni 5 million kishidan oshgan.

Ro‘yxatning “kuchli uchligiga” Hindiston yakun yasagan — bir sutkada 44 879 bemor. Ushbu mamlakatda koronavirusga chalinganlar soni 8 million kishidan ortiqni tashkil etmoqda.

Eslatib o‘tamiz, bundan oldingi bir sutka davomida AQSh va Rossiyada COVID-19’ga chalinishlar soni bo‘yicha antirekord yangilangandi. Shuningdek, 4—11-noyabr kunlari dunyoda koronavirusga chalinganlar soni ikki marta rekord darajaga chiqqan.