Koronavirus pandemiyasi davrida qo‘rquv va stressdan qutulishga kun tartibiga doimiy rioya qilish yordam beradi. Bu haqda Jahon sog‘liqni saqlash tashkiloti ma’lum qildi, deb yozadi “RBK”.
Masalan, har kuni bir vaqtda uyquga yotish va uyqudan turishga harakat qilish, muntazam ravishda sog‘lom ovqatlanish va sport bilan shug‘ullanish, shuningdek, ishdan dam olib turish kerak.
Shu bilan birga, tashkilotda qayd etishlaricha, bu vaqtda vahima va stressga tushish — normal holat. “Qo‘rquv, bezovtalik va stress — haqiqiy yoki tasavvur qilinayotgan xavfga nisbatan, shuningdek, ba’zan noaniqlik yoki noma’lumlikka duch kelgan paytimizdagi normal reaksiya”, — deya aniqlik kiritdi tashkilotdagilar.
Ayni paytda yakkalanish, daromaddan ajralish yoki qo‘rquv ruhiy buzilishga turtki berishi yoki avvaldan mavjud bo‘lgan kasallikni o‘tkirlashtirishi mumkin, deyiladi JSST xabarida. Ko‘pchilik bu davrda spirtli ichimliklarni suiiste’mol qilishi va narkotiklar qabul qilishni boshlashi, uyqusizlikdan azob chekishi mumkin. “Avvaldan ruhiy, nevrologik yoki narkologik kasalliklari bo‘lgan odamlar davolash xizmatlaridan foydalanish imkoniyati tizimdan chiqqan bir paytda ayniqsa qaltis vaziyatda”, — deya qo‘shimcha qildi tashkilot.
Avvalroq JSST gripp va koronavirus simptomlari o‘rtasidagi farqlarni ma’lum qilgan edi. COVID-19 va gripp yo‘tal, tumov, tomoq og‘rig‘i, isitma, holsizlik kabi o‘xshash simptomlarga ega. Ammo COVID-19 ta’m va hid bilish hissining yo‘qolishi, nafas qisishi kabi qo‘shimcha simptomlarni keltirib chiqarishi mumkin. Koronavirusning og‘ir formasida bemorlarda nafas qisishi, ishtaha yo‘qolishi, ko‘krak sohasida muttasil og‘riq yoki bosim, 38 darajadan yuqori harorat, shuningdek, ong chalkashishi kuzatilishi mumkin.
Shuningdek, JSST grippga qarshi vaksina koronavirusdan himoya qilmasligini ma’lum qildi. Grippga qarshi vaksina COVID-19 virusiga qarshi samarali emas, lekin gripp infeksiyasining oldini olish uchun har yili vaksinatsiyadan o‘tish qattiq tavsiya etiladi.
Izoh (0)