Беларусь президенти Александр Лукашенко ўғилларини ўзига ворис сифатида тайёрламаётганини маълум қилди. Унинг сўзларига кўра, мамлакатда ҳокимиятинг транзити амалга ошмайди, масалани Беларусь халқи президентни сайлаш орқали ҳал этади, деб ёзади «Коммерсантъ».
«Ўғилларимдан ҳеч бири мендан кейин президент бўлмайди. Ҳеч бири! Йигирма йил аниқ президент бўлмайман. Мен қурмоқчи бўлган конструкциядан келиб чиқадиган бўлсак, беш йил ҳам президент бўлмайдигандекман», — дейди Лукашенко.
Унинг сўзларига кўра, барчаси Беларусдаги вазиятга боғлиқ. «У тинч, нормал бўлса, Конституцияни қабул қиламиз, барча бўғинларда, барча ҳукумат тузилмаларида сайловлар ўтказамиз ва ўйлайманки, бунга беш йил керак бўлмайди», — дея Лукашенко президентлик лавозимига ворис танламаётганини қўшимча қилган. «Ҳукуматнинг транзити бўлмайди! Ҳеч қандай ворислар. Халқ кимни танласа, шу бўлади. Мен қасам ичганман. Мен Беларусь халқи қандай қарорга келса, шундай бўлади деб ваъда берганман», — дейди Лукашенко.
Маълумот учун, Беларусь президентининг учта ўғли бор. Катта ўғли Виктор мамлакат Хавфсизлик кенгаши аъзоси, миллий хавфсизлик бўйича ёрдамчи, Миллий олимпия қўмитасининг биринчи вице-президенти ҳисобланади. Ўртанча ўғли Дмитрий — «Президент спорт клуби» давлат-жамоат кенгаши раиси, кенжаси Николай — ўқувчи.
Мавзуга доир: Александр Лукашенко намойишчиларга нисбатан ҳукуматнинг жавоби кучайтирилишидан огоҳлантирди
Изоҳ (0)