Арманистон ҳукумати учта давлат раҳбарларининг Тоғли Қорабоғда ўт очишни тўхтатиш ҳақидаги баёноти Тоғли Қорабоғ масаласининг кенг қамровли ечими деб ҳисобламайди. Бу ҳақда Арманистон ташқи ишлар вазири Зограб Мнацаканян Россия ташқи ишлар вазири Сергей Лавров, Франция ташқи ишлар вазири Жан-Ив Ле Дриан ва АҚШ давлат котиби ўринбосари Стивен Биган билан телефон орқали музокаралар чоғида айтиб ўтди, деб ёзади «РБК».
«Юқорида тилга олинган баёнот ўт очишни тўхтатиш режимини ўрнатишга ва Арцахга тинчликпарварларни жойлаштиришга қаратилган, у Тоғли Қорабоғ масаласининг кенг қамровли ечими бўла олмайди», — деди вазир.
Аввалроқ Арманистон бош вазири Никол Пашинян шунга ўхшаш фикрни урушдаги мағлубият сабабларини тушунтириб, халққа қилган навбатдаги мурожаатида билдирган эди.
«Ушбу ҳужжатда масаланинг сермазмун ечими кўзда тутилмаган, балки шунчаки жанговар ҳаракатларни тўхтатиш назарда тутилган. Қорабоғ масаласи ҳамон ҳал қилинмаган ҳолда қолмоқда», — деди Пашинян.
Айни вақтда Бокудан бунга қарама-қарши маънодаги баёнотлар янграмоқда. Озарбайжоннинг Россиядаги элчиси Пўлат Булбулўғли «РБК»га берган интервьюсида ўт очишни тўхтатиш ҳақидаги баёнотни муаммонинг ечими деб баҳолаганди.
«Статус-кво (жорий вазият) йўқ, мавжуд эмас ва бошқа ҳеч қачон бўлмайди. Бу ярашув эмас, бу Қорабоғ масаласининг ечими. Сиз таъкидлаб ўтган гап мутлақо тўғри — Боку қаршисида бошқа муаммо йўқ. Муаммо энди йўқ, у ҳал қилинди», — дея қайд этди элчи.
Озарбайжон президенти Илҳом Алиев ватандошларини урушдаги ғалаба билан қутлади ва Тоғли Қорабоғнинг алоҳида мақоми ғояси янги келишувлардан кейин бошқа муҳокама қилинмаслигини айтди.
Россия ташқи ишлар вазири Сергей Лавров Тоғли Қорабоғ ҳудудининг мақоми ушбу минтақадаги барча тоифадаги аҳолининг ҳуқуқлари тушунарли бўлганидан кейин аниқланишини айтди.
9 ноябрь куни кечқурун Арманистон, Озарбайжон ва Россия раҳбарлари тинчлик битимини имзолагани маълум бўлди. Унга мувофиқ, Арманистон Тоғли Қорабоғ ҳудудларининг катта қисмини ва 1990 йилдан бери Ереван тасарруфида қолган ҳудудларни Озарбайжонга топширади. Арманистон Қуролли кучлари ўз позицияларидан олиб чиқилмоқда, минтақага 2 мингта рус тинчликпарвари техника билан олиб келинмоқда. Арманистонга Қорабоғга транспорт йўлаги яратилиши кафолатланади, шу билан бир вақтда Озарбайжондан Нахичеван эксклавигача транспорт йўлаги яратилади.
Кремль президент Алиевнинг ушбу келишув Арманистоннинг «таслим бўлиши» ҳақидаги илгари айтилган сўзларига қўшилмади. Россия президенти матбуот котиби Дмитрий Песков ушбу ҳужжат қон тўкилишига чек қўйиб, «икки халқнинг, Арманистон ва Озарбайжоннинг ғалабаси» бўлганини айтди.
Изоҳ (0)