Tanzaniyaning yangiliklar nashrlariga mamlakatdagi koronavirus bilan bog‘liq vaziyat haqida yozish taqiqlab qo‘yilgan. Bu haqda “Chegara bilmas reportyorlar” (RSF) xabar tarqatdi.
Taqiq sabablari bo‘yicha hanuzgacha rasmiy ma’lumot yo‘q. So‘nggi bor 29-aprelda mamlakat hukumati tomonidan COVID-19 bilan kasallanish holatlari yuzasidan axborot berilgan. Bahorda berilgan statistikaga ko‘ra 500 ta kasallanish va 21 ta o‘lim holatlari kuzatilgan.
Mahalliy nashrlarda ishlovchi jurnalistlar nimalar bo‘layotganini aniqlashga urinib ko‘rgan, ammo hukumat yangi kasallanish holatlari qayd etilmagani va shu sababli ham bu borada gapiriladigan gapning yo‘qligini ma’lum qilgan.
Bu borada axborot to‘plashga uringan jurnalistlar hibsga olinmoqda. Gazeta va jurnallarda kasallar haqidagi va hukumatning qarorlari yuzasidan surishtiruv materiallari e’lon qilinmayapti.
Avgust oyida hukumatning jurnalistlarga amaldorlardan axborot olmay turib, pandemiya haqida materiallar e’lon qilishni taqiqlash haqidagi farmoyishi qabul qilingani xususida xabarlar tarqalgan. Ammo hukumat vakillari ushbu xabarlar yuzasidan izoh bermagan.
Tanzaniya RSF’ning so‘z erkinligi bo‘yicha reytingida 124-o‘rinda joylashgan. Biroq 2016-yilda ushbu davlatda bu boradagi ko‘rsatkich ancha yaxshi edi va Tanzaniya mazkur reytingning 71-pog‘onasida turardi.
BBC’ning yozishicha, Tanzaniyada 2015-yildan buyon Jon Magufili prezidentlik qilib kelmoqda. U koronavirus pandemiyasi davrida mamlakatda chiqarilgan o‘ziga xos qarorlari bilan tarixda qolgan. Magufili karantin davrida odamlarni uyda qolishga emas, aksincha masjidlar va cherkovlarga borib ibodat qilishga chaqirgan. Keyinchalik ijtimoiy masofalanish hamda tibbiy niqoblar taqish qoidalariga ham qarshi chiqqan. Mamlakatni yopish iqtisodiyotga jiddiy zarar keltirishini ta’kidlab, Tanzaniyaga qo‘shni davlatlarni lokdaun e’lon qilgani uchun qoralagan. Shuningdek, Tanzaniya prezidenti koronavirusni hammomda terlab, ingalyatsiya orqali yengish mumkinligi haqida o‘z davolash uslubini mamlakatda keng targ‘ibot qilgan.
Magufili iyunda mamlakatning koronavirusdan ozod bo‘lganini e’lon qilgan. Tanzaniyada qurilgan davolash va izolyatsiya markazlari yopilgan.
Izoh (0)