Tog‘li Qorabog‘ hududida jangovar harakatlarni to‘xtatish haqidagi kelishuvga asosan Ozarbayjon nazorati ostiga o‘tishi kerak bo‘lgan Kalbajar tumani aholisi o‘z uylarini ommaviy ravishda tark etishni boshladi, ba’zilar esa o‘z uylarini yoqib yubormoqda. Bu haqda “RBK” xabar berdi.
“Sputnik Armaniston” agentligi tomonidan e’lon qilingan videoda Kalbajar aholisi o‘z yerlarini tashlab, hududdan chiqib ketayotganini ko‘rish mumkin. “Qorabog‘da shimoliy yo‘l mashinalar bilan to‘lgan”, — deyiladi xabarda.
Qayd etilishicha, avtomobillar oqimida ko‘plab mikroavtobuslar va yuk mashinalari bor. “Odamlar olib ketish mumkin bo‘lgan barcha narsani olib ketmoqda — uy jihozlari, mebel, hayvonlar. Ba’zilar esa o‘z uylarini yoqib yubormoqda”, — deyiladi agentlik xabarida.
Agentlik ma’lumotlariga ko‘ra, Ozarbayjon nazoratiga o‘tishi kerak bo‘lgan tumanlarda odamlar do‘konlarni, uylarni va elektr nimstansiyalarini buzib, olib ketmoqda.
Tog‘li Qorabog‘da Ozarbayjon va Armaniston o‘rtasidagi jangovar harakatlar 27-sentabr kuni qayta boshlandi. Ikkala davlat ham harbiy holat joriy qildi va bir-birini tinch aholiga qarshi hujumlarda aybladi. Qurbonlar ham harbiy xizmatchilar, ham oddiy odamlar bo‘ldi. 9-oktabrda Moskvada ziddiyatli tomonlarning vakillari bilan muzokaralar olib borildi, natijada jangovar harakatlarni to‘xtatish to‘g‘risida qaror qabul qilindi. O‘t ochishni to‘xtatish 10-oktabr kuni ertalab kuchga kirdi.
10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Hujjatga ko‘ra, Boku va Yerevan egallab turgan pozitsiyalarida to‘xtab, Tog‘li Qorabog‘ hududining bir qismi, shu jumladan, strategik jihatdan muhim Shusha shahri Ozarbayjonga o‘tadi. Shartlarda aytilishicha, Armaniston 20-noyabrgacha Agdam va Kalbajar tumanlarini, 1-dekabrga qadar Lachinni Ozarbayjonga qaytarishi kerak. Shuningdek, kelishuv mintaqaga Rossiya tinchlikparvar kuchlarini kiritishni nazarda tutadi.
Izoh (0)