BMW kompaniyasi Sport Activity Vehicle (SAV) segmentiga kiruvchi va dizayn, elektrifikatsiya hamda avtonom boshqaruv sohasidagi so‘nggi yutuqlar bilan jihozlangan iX elektrokrossoverini taqdim etdi. Mazkur modelni ishlab chiqarish Dingolfingdagi zavodda 2021-yilning ikkinchi yarimidan boshlanadi, deb xabar beradi Motor.
Seriyali elektrokrossover uzunligi va eni bo‘yicha BMW X5 bilan, balandligi bo‘yicha X6’ga teng, o‘qlari orasidagi masofa uch metr. iX suriladigan eshik tutqichlari, hoshiyasiz yon eshiklar va kuzovning orqasini to‘liq egallagan yukxona eshigiga ega. Bundan tashqari, o‘ziga xos dizayn ham mavjud — shu vaqtga qadar BMW avtomobillariga o‘rnatilgan eng ingichka faralar (yorug‘lik diodli bazaviy va lazerli — qo‘shimcha haq evaziga), shuningdek, kameralar, radarlar va boshqa datchiklar bilan integratsiyalashgan an’anaviy radiator panjarasi o‘rnidagi panel.
BMW’ning ma’lum qilishicha, poliuretan bilan qoplangani hisobiga mayda qirilgan joylar o‘z-o‘zidan yo‘qolib ketishga qodir — 24 soat davomida xona harorati va besh daqiqa issiq havo oqimi sabab.
Elektrokar 500 ot kuchiga ega ikkita motor yordamida harakatga kelib, soatiga 100 kilometr tezlikka besh soniyadan kamroq vaqt ichida erishadi. Avtomobil ishlab chiqaruvchining so‘zlariga ko‘ra, “100 kilovatt-soatdan oshadigan” batareyalar sig‘imi sabab IX bir marta quvvatlanish orqali WLTP sikli bo‘yicha 600 kilometrdan ortiq yo‘l bosa oladi.
Oddiy tarmoqdan 100 foizli quvvatlanish uchun 11 soat kerak bo‘ladi. Biroq boshqa tezkor variant ham inobatga olingan: 200 kVt quvvatga ega o‘zgarmasdan tokdan 80 foizga energiya zaxirasini 40 daqiqada olish mumkin, 120 kilometrga yetadigan masofa uchun — 10 daqiqa kifoya qiladi.
iX— yangi avtonom boshqaruv funksiyasiga ega bo‘lgan Bavariya markasining birinchi modeli. Bundan tashqari, u 5G aloqa tarmog‘ini qo‘llab-quvvatlaydi, avtomobilning hisob quvvati darajasi esa boshqa BMW’larga qaraganda ikki barobar ko‘proq ma’lumotlarni qayta ishlash imkonini beradi.
iX’ning boshqa xususiyatlari ham bor, masalan, old oynani yuvishga mo‘ljallangan qurilma, kapot ostiga berkitilgan logotip va orqani ko‘rishga mo‘ljallangan kamera. Old panelni deyarli to‘liq 12,3 yoki 14,9 dyuymli egilgan multimedia paneli egallagan.
Modelning bazaviy jamlanmasidan 12 ta dinamika va 205 vattli kuchaytirgich, 18 ta dinamikka ega Harman/Kardon tizimi o‘rin olgan. Bunga muqobil sifatida quvvati 1615 vattga teng 30 dinamikali Bowers & Wilking Surround Sound audiotizimidan foydalanish mumkin. Shuningdek, bazaviy versiya 20 dyuymli diskalar bilan jihozlangan, 21 va 22 dyuymli Air Performance Wheels g‘ildiraklari oddiy g‘ildiraklardan 15 foizga yengil bo‘lib, ular uchun qo‘shimga haq to‘lash kerak.
Izoh (0)