Toshkent shahri Olmazor tumanida begonaga tegishli Spark avtomobilini olib qochib, yo‘l-transport hodisasi sodir qilgan 21 yoshli yigit qamoqqa olindi, deya xabar bermoqda Tergov departamenti.
Qayd etilishicha, 2020-yilning 7-noyabr kuni soat 11:00 dan soat 14:00 ga qadar bo‘lgan vaqt oralig‘ida noma’lum shaxs transport vositasini olib qochish maqsadida 27 yoshli B.M. boshqarib kelayotgan va 34 yoshli turmush o‘rtog‘i D.M.ga tegishli bo‘lgan qora rangli Spark rusumli avtoulovini Toshkent shahar, Olmazor tumani, Zarqaynar ko‘chasida joylashgan Abdulla Qodiriy nomidagi istirohat bog‘i yonida qarovsiz qoldirilganidan foydalanib, avtoulovning saloniga g‘ayriqonuniy ravishda kirib olgan.
U o‘t oldirish tizimida turgan kalit bilan avtoulovni olib qochib, hodisa joyidan yashiringan.
Shundan so‘ng noma’lum shaxs avtomashinani boshqarib borayotib, Yunusobod tumanida Nexia rusumli avtomashina bilan to‘qnashib YTH sodir qilgan.
Nexia avtomashinasi haydovchisi bilan “kelishib olish” maqsadida uni keyinroq uchrashib, zararni qoplab berishga ishontirib, avtomashinada bo‘lgan hamda transport vositasining egasiga tegishli avtoulovning texnik pasportini berib yuborgan.
IIO xodimlaridan yashirinish maqsadida avtomashinaning davlat raqamlarini yechib olib, hodisa joyidan yashiringan.
Biroq ichki ishlar organlari xodimlarining tezkor harakatlari va YTH sodir bo‘lgan kameralarda qayd qilingan videoyozuvlar yordamida ushbu fuqaro 21 yoshli, muqaddam sudlangan M.A.ligi aniqlangan.
Qoidabuzar fuqaroni ushlash choralari ko‘rilganda M.A. olib qochilgan avtomashinani o‘zi istiqomat qiladigan ko‘p qavatli uylarning oldida tashlab, uy yumushlari bilan shug‘ullanib yurganligi aniqlanib, protsessual tarzda ushlangan.
Mazkur holat yuzasidan ayblanuvchiga nisbatan Olmazor tumani IIO FMB Tergov bo‘limi tomonidan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. M.A. ayblanuvchi tariqasida jinoyat ishida ishtirok etishga jalb qilinib, unga nisbatan qamoqqa olish tarzidagi ehtiyot chorasi qo‘llanilgan. Hozirda tergov harakatlari davom etmoqda.
Avvalroq Toshkent viloyatida Milliy gvardiya harbiy kiyimini kiyib olgan bosqinchilar, Toshkentda Kamerun fuqarosini tutqunlikda saqlagan jinoiy guruh hamda Samarqandda korxona direktorining Trailblazer’ini olib qochmoqchi bo‘lgan ishchi qo‘lga olingani haqida xabar berilgandi.
Izoh (0)