Buxoro shahrida ijaraga olingan uyida qimorxona tashkil qilgan 25 yoshli qashqadaryolik fuqaro qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Qashqadaryo viloyatining Kasbi tumanida ro‘yxatda turuvchi fuqaro Z.X. Buxoro shahridan ijaraga uy olib, xonadonida tavakkalchilikka asoslangan qimor o‘yinlarini tashkil qilgan. U tanishlari E.M., O.A., U.R., Ch.B., A.R. va S.S.ga qimor o‘yinlari o‘ynashi uchun alohida joy ajratib berib, qo‘ni-qo‘shnilari tinchini buzgan.
Xabarga ko‘ra, qimor o‘yinlari qizigan vaqtda qashqadaryolikning ijaradagi xonadoniga Buxoro shahar Ichki ishlar organlari faoliyatini muvofiqlashtirish boshqarmasi, shuningdek, viloyat Ichki ishlar boshqarmasi Post-patrul xizmati va jamoat tartibini saqlash boshqarmasi PPX batalyoni xodimlari yetib kelgan.
Qimor o‘yinlari davomidagi mavjud ashyoviy dalillar tegishli tartibda hujjatlashtirib olingan.
Holat yuzasidan Buxoro shahar Ichki ishlar organlari faoliyatini muvofiqlashtirish boshqarmasi 1-son Ichki ishlar bo‘limi huzuridagi tergov guruhi tomonidan qashqadaryolik fuqaro Z.X.ga nisbatan Jinoyat kodeksining 278-moddasi 1-qismi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
Izoh (0)