Buxoro viloyat IIB Ekspert kriminalistika bo‘limi 2020-yilning 11-noyabr kuni sof vazni 1479 gramm bo‘lgan giyohvandlik moddasini sotishni maqsad qilgan jinoiy guruhni qo‘lga oldi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Buxoro shahrida yashovchi 63 yoshli S.I. uyida bir dona oq rangli qop, bir dona bo‘yoq idishi hamda 88 dona gugurt qutilarga joylangan jami 1479 grammga teng marixuanna giyohvandlik moddasini qonunga xilof ravishda sotishni maqsad qilib, saqlab kelgan.
Buxoro IIB tezkor guruhi vakillari tomonidan ushbu holat bo‘yicha tergovga qadar tekshiruv o‘tkazilgan.
Aniqlanishicha, S.I. ushbu giyohvandlik moddalarini 43 yoshli tanishi fuqaro A.R.dan 1,5 million so‘m evaziga xarid qilgan va kelgusida uni sotib, mo‘may daromad orttirishni maqsad qilgan.
S.I.ning ko‘rsatmasi asosida fuqaro A.R.ning yashash xonadonida ham tergovga qadar tekshiruv harakatlari olib borilgan.
“Tezkor tadbir jarayonida fuqaro A.R.ning yonlari xolislar ishtirokida ko‘zdan kechirildi. Uning ustki kiyimi yon cho‘ntaklaridan 9 dona gugurt qutilarga joylangan, shuningdek, yashash xonadonining molxonasidagi hashaklar orasidan uch dona qog‘ozga o‘ralgan marixuanna topildi. Sof vazni 71 grammni tashkil qilgan ushbu giyohvand modda xolislar ishtirokida hujjatlashtirib olindi. Bu bir guruh shaxslar o‘zaro til biriktirib, bu giyohvand moddalarni sotib, mo‘may daromad topish maqsadini ko‘zlashgani fosh etildi”, — deydi Shuhrat Jalolov.
Mazkur holatlar yuzasidan Buxoro shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan jinoyat ustida qo‘lga olingan S.I. va A.R.ga nisbatan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish), 273-moddasi 5-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
Izoh (0)