Бухоро шаҳрида ижарага олинган уйида қиморхона ташкил қилган 25 ёшли қашқадарёлик фуқаро қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Қашқадарё вилоятининг Касби туманида рўйхатда турувчи фуқаро З.Х. Бухоро шаҳридан ижарага уй олиб, хонадонида таваккалчиликка асосланган қимор ўйинларини ташкил қилган. У танишлари Э.М., О.А., У.Р., Ч.Б., А.Р. ва С.С.га қимор ўйинлари ўйнаши учун алоҳида жой ажратиб бериб, қўни-қўшнилари тинчини бузган.
Хабарга кўра, қимор ўйинлари қизиган вақтда қашқадарёликнинг ижарадаги хонадонига Бухоро шаҳар Ички ишлар органлари фаолиятини мувофиқлаштириш бошқармаси, шунингдек, вилоят Ички ишлар бошқармаси Пост-патруль хизмати ва жамоат тартибини сақлаш бошқармаси ППХ батальони ходимлари етиб келган.
Қимор ўйинлари давомидаги мавжуд ашёвий далиллар тегишли тартибда ҳужжатлаштириб олинган.
Ҳолат юзасидан Бухоро шаҳар Ички ишлар органлари фаолиятини мувофиқлаштириш бошқармаси 1-сон Ички ишлар бўлими ҳузуридаги тергов гуруҳи томонидан қашқадарёлик фуқаро З.Х.га нисбатан Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Изоҳ (0)