Andijon viloyatining Xo‘jaobod tumanida Fuqarolik holatlari dalolatnomalarini yozish bo‘limi xodimlari tomonidan sud qaroriga asosan onaligi belgilangan, to‘rt farzandini uyida dunyoga keltirgan Nazira Isaqovaning farzandlariga tug‘ilganlik haqida guvohnomalar berildi. Bu haqda “Daryo” muxbiri Umidjon Mamarasulov xabar berdi.
Aniqlanishicha, yaqinda o‘zining 16 yoshini qarshilagan xo‘jaobodlik Behruzbek Isoqov va uning ukalari Po‘latbek, Rustambek, singlisi Gulasal tug‘ilganligi o‘z vaqtida qayd etilmaganligi bois ancha qiyinchiliklarni boshdan kechirgan. Guvohnomasiz bog‘chaga olinmagan bolalar maktabga chiqayotganda ham muammoga duch kelgan. Eng yomoni, shu kungacha bolalarning birortasiga davlat shifoxonalarida kasallik varaqalari ochilmagan.
Bolalarning onasi Naziraxon Isaqovaning aytishicha, u shu muammolar bilan bir necha marotaba hokimlik va FHDYo xodimlariga murojaat qilingan. Biroq bolalariga guvohnoma olishi uchun sudning qarori kerakligini eshitib qaytgan.
Xo‘jaobod tumani FHDYo mudirasi Gulnoza Mamatovaning tashabbusi va bir nechta homiylarning yordami bilan pul mablag‘lari yig‘ilib, Nazira Isaqova hamda uning to‘rt farzandi uchun u yoki bu onadan tug‘ilganlik faktini tasdiqlash maqsadida DNK tekshiruvlari o‘tkazilgan. Biologik ekspertiza xulosalariga ko‘ra, uning bolalarning onasi ekanligi tasdiqlangan. So‘ngra sud qaroriga ko‘ra, Isaqovaning 16 yoshli Behruzbek, 11 yoshli Po‘latbek, 10 yoshli Rustambek va endigina 7 yoshni qarshilagan Gulasal ismli farzandlariga tug‘ilganlik haqidagi guvohnomalar rasmiylashtirilgan.
Davlat xizmatlari agentligi Andijon viloyati boshqarmasi axborot xizmatining qo‘shimcha qilishicha, boshqarma boshlig‘i Mahmudjon Abdijaliyev va Xo‘jaobod tumani hokimligi vakillari Isaqovalar xonadoniga borib, bolalarning tug‘ilganlik to‘g‘risidagi guvohnomalarni tantanali ravishda topshirgan.
Prezidentning 2018-yil 12-iyundagi “Fuqarolik holati dalolatnomalarini qayd etish tizimini yanada takomillashtirish chora-tadbirlari to‘g‘risida”ni qarori ijrosini ta’minlash doirasida Xo‘jaobod tumani FHDYo bo‘limi tomonidan 2018—2020-yillar davomida 200 nafarga yaqin fuqaroning tug‘ilishi muddati o‘tgach rasmiylashtirilgan.
Izoh (0)