Toshkent viloyatida tezlikni oshirgan mashinalarning jarimalari boshqa manzilga yuborilgan. Bunga e’tiborsizlik qilgan mas’ullarga xizmat tekshiruvi belgilandi

Ijtimoiy tarmoqlarda 11-noyabr kuni tezlikni me’yoridan oshirib transport vositasini boshqarganlik bo‘yicha chiqarilgan qaror boshqa transport vositasining egasiga jo‘natilgani aks etgan suratlar tarqaldi. Ichki ishlar vazirligi Yo‘l harakati xavfsizligi bosh boshqarmasi mazkur holatga izoh berdi.

Ma’lum qilinishicha, suratlar o‘rganilganda Toshkent viloyati IIBB YHXB mas’ul xodimlari tomonidan xato va kamchiliklarga yo‘l qo‘yilgani aniqlangan.

2020-yilning 21-yanvar kuni soat 10:52 da Toshkent viloyati Bo‘ka tumani hududidan o‘tgan A-373 avtomobil yo‘lining 70—71-kilometrlari oralig‘ida tezlik soatiga 70 kilometr bilan chegaralangan yo‘lda davlat raqami 10 E 060 MA bo‘lgan Nexia avtomobil haydovchisi soatiga 79 kilometr tezlik bilan harakatlangan. Bu holat maxsus moslama orqali qayd etilgan. Qayd etish vaqtida avtomatik tarzda 10 E 060 MA davlat raqam belgisidagi 6 raqami 5 bo‘lib, 10 E 050 MA raqami bilan qayd etilgan. Mas’ul nazoratchining e’tiborsizligi sababli ushbu jarima Sinotruck Howo rusumli, 10 E 050 MA davlat raqam belgili yuk avtomashinasi egasining yashash manziliga yuborilgan;

Shuningdek, 2020-yilning 7-noyabr kuni soat 22:09 da Toshkent viloyati Bo‘ka tumani hududidan o‘tgan A-373 avtomobil yo‘lining 78—79-kilometrlari oralig‘ida tezlik soatiga 70 kilometr bilan chegaralangan yo‘lda Captiva rusumli, 25 444 EAA davlat raqam belgili avtomobil haydovchisi soatiga 116 kilometr tezlik bilan harakatlangan. Bu holat ham maxsus moslama orqali qayd etilgan. Qayd etish vaqtida avtomatik tarzda 25 444 EAA davlat raqam belgisidagi 2 raqami 7 bo‘lib, 75 444 EAA raqami bilan qayd etilgan. Mas’ul nazoratchining e’tiborsizligi sababli ushbu jarima Honda Elysion rusumli, 75 444 EAA davlat raqam belgili avtomobil mulkdorining manziliga yuborilgan.

Ayni vaqtda ushbu qoidabuzarliklar yuzasidan Sinotruck Howo yuk mashinasi mulkdori Sh.X. va Honda Elysion avtomobil mulkdori “Temiz sohili XK”ga nisbatan belgilangan jarima solish to‘g‘risidagi qarorlar belgilangan tartibda bekor qilindi.

Shuningdek, ushbu xatolikka yo‘l qo‘ygan nazoratchi mas’ullarga nisbatan Toshkent viloyati IIBB YHXB tomonidan xizmat tekshiruvi o‘tkazilmoqda.