Armaniston prezidenti Armen Sarkisyan Tog‘li Qorabog‘da urushni to‘xtatish bo‘yicha imzolangan bitimni u bilan muhokama qilishmaganini va muzokaralarda qatnashmaganini ma’lum qildi. Bu boradagi tegishli xabar prezident saytida e’lon qilingan.
“Rossiya va Ozarbayjon prezidentlari tomonidan urushni to‘xtatish bo‘yicha bitim imzolanganini matbuot orqali bildim. Shuningdek, aynan matbuot orqali urushni to‘xtatish shartlaridan xabar topdim”, — deyiladi xabarda.
Mamlakat rahbarining hisoblashicha, Qorabog‘ masalasi faqatgina umummilliy manfaatlar hisobga olingan holda va umummilliy konsensus asosida hal etilishi lozim.
Shuningdek, Armaniston prezidentining ma’lum qilishicha, ayni vaqtda uning dolzarb missiyasi — “umummilliy birlikni shakllantirish”. U o‘n kunlik muddat ichida armanlar bu kabi birlikni shakllantirishiga umid bildirgan.
Eslatib o‘tamiz, Armaniston, Ozarbayjon va Rossiya yetakchilari 9-noyabr kuni kechqurun Qorabog‘da janglarni to‘xtatish haqida uch tomonlama shartnoma imzoladi. Sulh shartlari Kelbajar, Agdam, Lochin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi. Eni 5 kilometr keladigan Lochin koridori Armaniston ixtiyorida qolib, u Tog‘li Qorabog‘ va Armaniston o‘rtasidagi aloqani ta’minlab turadi.
Pashinyan Tog‘li Qorabog‘dagi urushni to‘xtatish bo‘yicha Ozarbayjon bilan kelishib olganini e’lon qilganidan so‘ng, Yerevan ko‘chalarida norozilik namoyishlari boshlangan. Namoyishchilar Armaniston hukumati binosiga ham bostirib kirgan. Ular Pashinyanning soatlari, kompyuteri va atirlari o‘g‘irlab ketgan.
Izoh (0)