Bortida Rossiyaning tinchlikparvar kuchlari bo‘lgan ilk samolyotlar Tog‘li Qorabog‘ga yo‘l oldi

Rossiyadan ichida tinchlikparvar kuchlari bo‘lgan dastlabki oltita samolyot Tog‘li Qorabog‘ tomon yo‘l oldi. Bu haqda Rossiya Mudofaa vazirligiga tayanib, “RBK” xabar berdi.

“Harbiy transport aviatsiyasining bortida rossiyalik tinchlikparvar kuchlari bo‘lgan oltita IL-76 samolyotlari Ulyanov-Vostochniy aerodromidan ko‘tarildi”, — deyiladi idora xabarida.

Samolyotlar bortida shaxsiy tarkib, moddiy vositalar va avtomobil texnikalari mavjud. Shuningdek, boshqa samolyotlar bilan zirhli transportyorlar ham yuborilgan.

Avvalroq Armaniston, Ozarbayjon va Rossiya mojaro zonada harbiy harakatlarni to‘xtatish bo‘yicha qo‘shma bayonotni imzolagan edi. Hujjatga ko‘ra, Tog‘li Qorabog‘ga rossiyalik tinchlikparvar kuchlar kiritiladi.

Kelishuvga ko‘ra, Qorabog‘dagi kesishuv chizig‘i va Lochin karidori yaqinida 90 ta zirhli transportyor, shuningdek, 380 ta avtomobil va maxsus texnikaga ega 1960 nafar rossiyalik harbiy xizmatchidan iborat Rossiya kontingenti joylashtiriladi.

Eslatib o‘tamiz, Tog‘li Qorabog‘dagi Ozarbayjon va Armaniston o‘rtasidagi mojaro 27-sentabrdan buyon davom etayotgandi. 31-oktabr kuni Rossiya Tashqi ishlar vazirligi Armaniston bosh vaziri Nikol Pashinyanning Rossiya prezidenti Vladimir Putinga qilgan murojaati munosabati bilan agar to‘qnashuvlar to‘g‘ridan to‘g‘ri Armaniston hududiga o‘tkazilsa, Rossiya rasmiy Yerevanga yordam berishini ma’lum qilgandi.

Armaniston bosh vaziri Nikol Pashinyan Germaniyaning ARD telekanaliga bergan intervyusida Qorabog‘ nizosi hududiga boshqa mamlakatlardan emas, Rossiyadan tinchlikparvarlarning kiritilishi eng samaralisi bo‘lishi mumkinligini aytgan.

9-noyabr kuni Rossiyaning Mi-24 vertolyoti Ozarbayjon armiyasi tomonidan urib tushirilgan. Ozarbayjon hodisa tasodifan yuz berganini ma’lum qildi va buning uchun uzr so‘ragan.