Armaniston bosh vaziri Nikol Pashinyan o‘z vatanida ekanligini va o‘z vazifalarini bajarayotganini ma’lum qildi, deb yozadi “RBK”. Uning bu bayonoti Qorabog‘da tinchlik shartnomasi imzolanganidan keyin yuzaga kelgan tartibsizliklar davom etayotgan bir paytda yangradi.
“Men, albatta, Armanistondaman va bosh vazirlik vazifamni to‘la-to‘kis bajaryapman”, — deb yozdi u Facebook’da.
Mahalliy vaqt bilan kechasi 2:30 atrofida Yerevan ko‘chalariga yuzlab namoyishchilar chiqib, Armaniston hukumati binosi yonida to‘plandi va qo‘riqchilar zanjirini yorib o‘tib, ichkariga bostirib kirdi, derazalarni sindirdi va ichki xonalarni ag‘dar-to‘ntar qildi. Bino qo‘riqchilari “RBK”ga ma’lum qilishicha, bu paytda bosh vazir ichkarida bo‘lmagan. Namoyish ishtirokchilari bosh vazirga qarata haqoratlar aytib, shundan so‘ng uning uyiga qarab yo‘l oldi. Norozilik aksiyalari chog‘ida Armaniston parlamenti spikeri do‘pposlangan.
Eslatib o‘tamiz, Armaniston, Ozarbayjon va Rossiya yetakchilari 9-noyabr kuni kechqurun Qorabog‘da janglarni to‘xtatish haqida uch tomonlama shartnoma imzoladi. Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.
Ozarbayjon prezidenti Ilhom Aliyev kelishuv hujjati imzolanishini “Armanistonning kapitulyatsiyasi (taslim bo‘lishi)” deb atadi. Uning so‘zlariga ko‘ra, Boku o‘zi uchun manfaatli bo‘lgan shartlarda tinchlikka erishgan va “barcha maqsadlari”ga yetgan.
“Gullab-yashnayotgan Armaniston” muxolifatchi partiyasi Yerevanning Qorabog‘ bo‘yicha kelishuvlardagi ishtirokini bekor qilish uchun navbatdan tashqari parlament majlisini chaqirish niyati haqida ma’lum qildi.
Izoh (0)