“Gullab-yashnayotgan Armaniston” muxolifatchi partiyasi Yerevanning Qorabog‘ bo‘yicha kelishuvlardagi ishtirokini bekor qilish uchun navbatdan tashqari parlament majlisini chaqirish niyati haqida ma’lum qildi, deb yozadi “RBK”.
“Biz bu qarorni bekor qilish maqsadida navbatdan tashqari majlis chaqirish uchun imzo to‘playapmiz”, — dedi deputat Ivetta Tonoyan. Ayni vaqtda Armaniston parlamentining yana bir a’zosi Naira Zograbyan Yerevanning Qorabog‘ bo‘yicha kelishuvdagi ishtirokini bekor qilish imkoniyati borligiga shubha qilishini aytdi.
“Sputnik Armaniston” yozishicha, “Gullab-yashnayotgan Armaniston”, “Dashnaksutyun” ARF va “Vatan” partiyalari yetakchilari Armaniston QK иosh shtabi rahbari Onik Gasparyan bilan uchrashib, mamlakatdagi vaziyatni muhokama qilgan. Partiyalar mamlakat qurolli kuchlarini va Qorabog‘ mudofaa armiyasini qo‘llab-quvvatlab, aholini tinchlik saqlashga chaqirgan.
Partiyalar yetakchilari tez orada hamkasblari bilan mamlakatdagi vaziyatni muhokama qilib, uning yechimi borasida takliflar taqdim etishini ma’lum qildi.
Eslatib o‘tamiz, Armaniston, Ozarbayjon va Rossiya yetakchilari 9-noyabr kuni kechqurun Qorabog‘da janglarni to‘xtatish haqida uch tomonlama shartnoma imzoladi. Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.
Sulh shartlaridan, xususan, Ozarbayjonga bahsli hududlarning bir qismi berilishidan norozi bo‘lgan namoyishchilar respublika hukumati binosiga bostirib kirdi. Ular Pashinyan ularga topshirilishini talab qildi, hukumatga qarshi shiorlarni baqirib aytdi. Shuningdek, Milliy majlis spikeri Ararat Mirzoyan do‘pposlandi. Namoyishchilar spiker o‘tirgan mashinani o‘rab olib, Mirzoyanni undan chiqarib olgan va do‘pposlagan. Armaniston poytaxti markazida jami bir necha ming kishi to‘plandi.
Keyinroq Pashinyan o‘z Facebook’ida jonli efirga chiqib, uning tinchlik shartnomasini imzolashdan boshqa chorasi bo‘lmaganini aytdi. Tafsilotlar haqida yaqin kunlarda ma’lumot berishni va’da qildi. Shuningdek, u Yerevandagi tartibsizliklar ishtirokchilari javobgarlikka tortilishini aytdi.
Izoh (0)