Yerevanda Armaniston parlamenti binosi yonida norozilik namoyishlarini uyushtirayotganlar Milliy majlis spikeri Ararat Mirzoyanni do‘pposladi, deya xabar bermoqda “RBK”.
Mirzoyanning soqchilari va namoyishchilar o‘rtasida to‘qnashuv yuzaga kelgan. Bu paytda spiker avtomobil ichida bo‘lgan. Namoyishchilar mashinani o‘rab olib, Mirzoyanni undan chiqarib olgan va do‘pposlagan.
Shundan so‘ng janjalga spikerning soqchilari va harbiylar aralashgan. Mirzoyanni yana mashinaga joylashtirishgan, uning ahvoli qandayligi noma’lum. “RBK”ning Yerevandagi muxbiri Mirzoyanning do‘pposlangani holatini tasdiqladi va ahvoli yomonligini ma’lum qildi.
Arminfo nashri yozishicha, Mirzoyan avtomobilda bolalari bilan birga bo‘lgan. Voqea joyiga tez yordam mashinasi yetib kelgan, ammo shifokorlar bir muddat jabrlanuvchining yoniga bora olmagan. Keyinroq “News.am” parlament spikeri kasalxonada ekanligini ma’lum qildi. “RBK”ning Armaniston SSVdagi manbasiga ko‘ra, Mirzoyanning hayotiga hech narsa xavf solmayapti.
Mirzoyan mamlakat bosh vaziri Nikol Pashinyan Tog‘li Qorabog‘da o‘t ochishni to‘xtatish haqidagi bitimni imzolaganini e’lon qilgach, Yerevanda boshlangan norozilik namoyishlari chog‘ida hujumga uchragan.
Sulh shartlaridan, xususan, Ozarbayjonga bahsli hududlarning bir qismi berilishidan norozi bo‘lgan namoyishchilar respublika hukumati binosiga bostirib kirdi. Ular Pashinyan ularga topshirilishini talab qildi, hukumatga qarshi shiorlarni baqirib aytdi. Armaniston poytaxti markazida jami bir necha ming kishi to‘plandi.
Eslatib o‘tamiz, Armaniston, Ozarbayjon va Rossiya yetakchilari 9-noyabr kuni kechqurun Qorabog‘da janglarni to‘xtatish haqida uch tomonlama shartnoma imzoladi. Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.
Izoh (0)