Арманистон президенти Армен Саркисян Тоғли Қорабоғда урушни тўхтатиш бўйича имзоланган битимни у билан муҳокама қилишмаганини ва музокараларда қатнашмаганини маълум қилди. Бу борадаги тегишли хабар президент сайтида эълон қилинган.
«Россия ва Озарбайжон президентлари томонидан урушни тўхтатиш бўйича битим имзоланганини матбуот орқали билдим. Шунингдек, айнан матбуот орқали урушни тўхтатиш шартларидан хабар топдим», — дейилади хабарда.
Мамлакат раҳбарининг ҳисоблашича, Қорабоғ масаласи фақатгина умуммиллий манфаатлар ҳисобга олинган ҳолда ва умуммиллий консенсус асосида ҳал этилиши лозим.
Шунингдек, Арманистон президентининг маълум қилишича, айни вақтда унинг долзарб миссияси — «умуммиллий бирликни шакллантириш». У ўн кунлик муддат ичида арманлар бу каби бирликни шакллантиришига умид билдирган.
Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лочин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади. Эни 5 километр келадиган Лочин коридори Арманистон ихтиёрида қолиб, у Тоғли Қорабоғ ва Арманистон ўртасидаги алоқани таъминлаб туради.
Пашинян Тоғли Қорабоғдаги урушни тўхтатиш бўйича Озарбайжон билан келишиб олганини эълон қилганидан сўнг, Ереван кўчаларида норозилик намойишлари бошланган. Намойишчилар Арманистон ҳукумати биносига ҳам бостириб кирган. Улар Пашиняннинг соатлари, компьютери ва атирлари ўғирлаб кетган.
Изоҳ (0)