Armaniston Mudofaa vazirligi va Bosh shtabi Tog‘li Qorabog‘dagi qon to‘kilishlarini to‘xtatishga chaqirgan murojaatini e’lon qildi, deb xabar beradi Meduza. Arman harbiylari bu kabi murojaatni Armaniston va Ozarbayjon hukumati Rossiya vositachiligida Qorabog‘dagi urushni to‘xtatish bo‘yicha imzolagan bitimidan bir necha soat o‘tib bildirgan.
“Armaniston, Rossiya va Ozarbayjonning siyosiy rahbariyati barchangiz mazmuni bilan tanishgan kelishuvga erishdi. Urush butunlay to‘xtagani yo‘q va Arsaxdagi jangovar harakatlar davom etmoqda. Shunga qaramay, biz mamlakatimizning harbiy-siyosiy rahbariyatini qarorini bajarishga va himoya qilishga majburmiz”, — deyiladi xabarda.
Armaniston prezidenti Armen Sarkisyanning ma’lum qilishicha, u urushni to‘xtatish va uning shartlari bo‘yicha imzolangan bitim to‘g‘risida “matbuot orqali” xabar topgan.
Armen Sarkisyanning so‘zlariga ko‘ra, urushning to‘xtatilishi to‘g‘risidagi bitim “har tomonlama konsultatsiya va muhokama predmetiga” aylanishi kerak. U “milliy manfaatlarni himoya qilish bo‘yicha kun tartibidan kelib chiqadigan qarorlarga iloji boricha tezroq kelishib olish uchun” siyosiy konsultatsiyalar tashabbusi bilan chiqayotganini bildirgan.
Eslatib o‘tamiz, Armaniston, Ozarbayjon va Rossiya yetakchilari 9-noyabr kuni kechqurun Qorabog‘da janglarni to‘xtatish haqida uch tomonlama shartnoma imzoladi. Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Urush tugagani e’lon qilingach, Armanistonda noroziliklar boshlangan. Yerevanda Armaniston parlamenti binosi yonida norozilik namoyishlarini uyushtirayotganlar Milliy majlis spikeri Ararat Mirzoyanni do‘pposlagan.
Izoh (0)