Ruminiyada 9-noyabrdan bir oyga komendantlik soati va majburiy niqob taqish rejimi joriy etildi, deb yozadi “RBK”. Avvalroq yangi cheklovlar haqida Ruminiya IIV Favqulodda vaziyatlar departamenti rahbari Rayed Arafat e’lon qilgan edi.
Yangi qoidalarga ko‘ra, 23:00 dan 5:00 gacha fuqarolarning ko‘chada yurishi taqiqlanadi. “Bu vaqt oralig‘ida, asosan, yoshlar u yoqdan bu yoqqa yuradi, bazmlarga boradi”, — deya aniqlik kiritdi Arafat.
Endi 23:00 dan keyin uyidan tashqarida bo‘lgan fuqarolardan ish guvohnomasi, rahbariyat tomonidan berilgan guvohnoma yoki komendantlik soatini buzish uchun asos bo‘ladigan shaxsiy javobgarlik deklaratsiyasini ko‘rsatish talab qilinishi mumkin.
Bundan tashqari, Ruminiyada umumiy niqob rejimi amal qilishni boshladi, maktablar masofadan o‘qishga o‘tkazildi.
Avvalroq Gretsiyada umummilliy karantin tartibi e’lon qilingani, Italiyaning barcha hududida koronavirus sababli komendantlik soati joriy etilgani, Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlangani, Latviyada koronavirus sabab favqulodda holat e’lon qilingani to‘g‘risida xabar berilgandi.
Eslatib o‘tamiz, butun dunyo bo‘ylab koronavirusga chalinganlar soni 50 million kishidan oshdi. Hozirga qadar dunyoda 1,2 milliondan ortiq odam COVID-19 qurboniga aylangan, 32,8 million nafar bemor sog‘aygan.
Izoh (0)