Gruziya poytaxti Tbilisida politsiya norozilik namoyishi ishtirokchilarini tarqatish uchun ko‘zni yoshlantiruvchi gaz va suv zambaraklarini qo‘lladi. Bu haqda “Sputnik Gruziya” va “RIA Novosti” agentliklari xabar bergan, deb yozadi “RBK”.
Namoyishchilar fikricha, mamlakatda bo‘lib o‘tgan parlament saylovlari qalbakilashtirilgan, shu sababli ular yangi saylov o‘tkazilishini talab qilmoqda.
Maxsus vositalar qo‘llanilgani haqida Mtavari Arkhi telekanali ham xabar berdi. Unga ko‘ra, suv zambaraklari va ko‘zni yoshlantiruvchi gaz ogohlantirishsiz qo‘llanilgan.
Keyinroq IIV gaz ishlatilganini rad etdi. Vazir o‘rinbosari Kaxaber Sabanadze bu xabarlarni dezinformatsiya deb atadi.
“TASS” o‘z muxbiriga tayanib yozishicha, mitingni tarqatib yuborish chog‘ida bir necha kishi jabrlangan, ularga tibbiy yordam berilmoqda.
Dastlab namoyishchilar Gruziya parlamenti binosi yaqiniga to‘plandi. Ularning qarshisida muxolifat partiyalari a’zolari nutq so‘zladi. “Yevropa Gruziyasi” partiyasi yetakchilaridan biri Elene Xoshtariya namoyish ishtirokchilari talablarini e’lon qildi: yangi parlament saylovlarini o‘tkazish, Markaziy saylov komissiyasi raisi Tamar Jvaniyaning iste’fosi, siyosiy mahbuslarni ozod etish.
Shundan so‘ng namoyishchilar MSK binosiga qarab yo‘l oldi, u yerda muddatsiz ish tashlash uyushtirmoqchi bo‘ldi.
Gruziya IIV e’lon qilgan bayonotda namoyishchilar MSK binosiga bostirib kirishga uringani haqida aytiladi. “Kun oxirida Markaziy saylov komissiyasi qarshisidagi miting chog‘ida namoyishchilar binoga bostirib kirishga urindi, bu videoyozuvlardan ko‘rinib turibdi, bu xatti-harakatlar politsiya tomonidan taqiqlangan. Namoyishchilar zo‘ravonlik usullarini qo‘llagani va politsiya ko‘rsatmalariga rioya qilmagani uchun, Ichki ishlar vazirligi qonun tomonidan berilgan vakolatlari doirasida proporsional kuch qo‘lladi”, — deyiladi muassasa xabarida.
Gruziyada norozilik aksiyalari bir necha kundan buyon davom etmoqda. 6-noyabr, juma kuni Gruziya OAVlari miting o‘tkazilayotgan joylarda otishma ovozlari eshitilganini xabar qilgan edi. Gruziyaning “Birinchi kanali” gilzalar topilganini ma’lum qilib, ular signal quroliniki deb taxmin qilgandi.
Eslatib o‘tamiz, Gruziyada parlament saylovlari 31-oktabr kuni bo‘lib o‘tdi. “Gruziya orzusi — demokratik Gruziya” hukmron partiyasi g‘oliblikka erishdi, hukmron partiya 48 foizdan ortiqroq ovoz to‘plagan. “Yagona milliy harakat” muxolifat partiyasi esa 27 foizga yaqin ovoz to‘plagan. “Yevropacha Gruziya — ozodlik uchun harakat” va “Vatanparvarlar alyansi” partiyalari 3 foizdan ko‘proq ovoz to‘plashga muvaffaq bo‘lgan. To‘qqizta partiya esa 1 foizli ko‘rsatkichdan o‘tgan.
Gruziya muxolifati saylovlarni soxtalashtirilgan deb hisoblamoqda. Muxolifat partiyalar yetakchilari xalqaro kuzatuvchilardan parlament saylovlarini qonuniy deya tan olmaslikni so‘rash niyati.
1-noyabr kuni Tbilisi markazidagi parlament binosi qarshisida muxolifatning norozilik namoyishi bo‘lib o‘tgan. Ularning yetakchilari parlament noroziliklari va 8-noyabr kuni keng ko‘lamli aksiya o‘tkazishni ma’lum qilib, erkin sharoitda yangi saylovlar o‘tkazish talabini qo‘ygan.
Izoh (0)