BAAda spirtli ichimliklar ichishga va nikohdan o‘tmasdan birga yashashga ruxsat berildi

Birlashgan Arab Amirliklarida spirtli ichimliklar ichish va nikohdan o‘tmasdan birga yashash endi jinoyat hisoblanmaydi. The National nashri xabar berishicha, mamlakat prezidenti Xalifa ibn Zaid al-Nahayon shaxsiy maqom to‘g‘risidagi qonunga, federal jinoyat kodeksiga va federal jinoyat-prosessual kodeksiga tuzatishlar kiritishni tasdiqlagan. Bu so‘nggi yillar ichida eng katta ko‘lamda huquq tizimining qayta ko‘rib chiqilishi bo‘lib, u ajrashish va vorislik qoidalaridan tortib, alkogol iste’moligacha bo‘lgan masalalarga tegishli bo‘ldi.

Litsenziyasiz alkogol iste’mol qilish

Gazeta qayd etishicha, “zudlik bilan kuchga kiradigan qonunlar sayyohlarni va to‘g‘ridan to‘g‘ri xorijiy investitsiyalarni qo‘shimcha jalb etishga, shuningdek, amirliklar aholisi uchun qoidalarni soddalashtirishga qaratilgan”. Xususan, tegishli litsenziyasiz alkogol iste’mol qilish haqidagi moddadan jinoyat so‘zi olib tashlangan, bu xususiy tartibda yoki buning uchun maxsus ajratilgan joylarda spirtli ichimliklarni iste’mol qilganlik, saqlaganlik yoki sotganlik uchun litsenziyasiz odam sud ta’qibiga uchramaydi. Ammo avvalgidek 21 yosh chegarasi saqlanib qoladi. Voyaga yetmaganlarga ichimlik sotishda qo‘lga tushganlar qonun bo‘yicha jazolanadi.

Alkogol bo‘yicha cheklovlar BAAda 2018-yildan boshlab asta-sekinlik bilan olib tashlangan. O‘shanda Abu-Dabida diniy bayramlar arafasida va bayram kuni alkogol iste’mol qilish va sotishga qo‘yilgan taqiq bekor qilingan edi. O‘sha yilning sentabrida shu shaharda amirliklar fuqarolari uchun litsenziya — do‘konlar, bar va restoranlarda alkogol sotib olish imkonini beruvchi maxsus karta olish qoidalari ham bekor qilingan edi. Dubayda esa kartali tizim shu paytgacha saqlanib qolgandi. Sayyohlar ham vaqtinchalik litsenziya olishi shart edi.

Nikohdan o‘tmasdan birga yashash

Bundan tashqari, Grazia nashri ma’lumotlariga ko‘ra, qonunchilikdagi o‘zgarishlar endi qarindosh bo‘lmagan yoki nikohdan o‘tmagan erkak va ayolning birga yashashiga ruxsat beradi. 14 yoshdan oshganlar uchun o‘zaro rozilik bilan munosabatlarga kirishish boshqa jinoyat hisoblanmaydi. Ammo voyaga yetmaganlarga va aqliy qobiliyati cheklangan odamlarga tajovuz qilganlik uchun jazo kuchaytirilmoqda — bunday jinoyat uchun o‘lim jazosi belgilangan. Ayollarga nisbatan ta’qib va jinsiy zo‘ravonlik uchun ham yanada qat’iyroq jazo ko‘zda tutilgan.

O‘z joniga qasd qilish

Jinoyat kodeksidan o‘zini o‘zi o‘ldirishga uringanlik uchun jazo haqidagi modda olib tashlandi. Shuningdek, kimgadir shoshilinch yordam ko‘rsatgan, ammo uni o‘limdan saqlab qololmagan odamlar ham javobgarlikka tortilmaydi.

Vorislik qoidalarining o‘zgartirilishi

Xorijiy investorlarning moliyaviy barqarorligini ta’minlash maqsadida vorislik qoidalari yangilandi. Endi meros vafot etgan shaxs kelib chiqqan mamlakat protokollariga muvofiq ravishda amalga oshiriladi, agar vasiyatnomada boshqacha holat ko‘rsatilmagan bo‘lsa. Mahalliy qonunlar BAAdagi har qanday xususiy mulkka nisbatan qo‘llaniladi. Nikohdan o‘tish va ajrashish shartlari er kelib chiqqan mamlakat emas, nikoh tuzilgan mamlakat qonunlariga muvofiq amal qiladi.