Butun dunyo bo‘ylab koronavirusga chalinganlar soni 50 million kishidan oshdi. Bu haqda kasallik tarqalishini real vaqtda kuzatib kelayotgan Jons Hopkins universiteti ma’lumotlarida keltirilgan.
Hozirga qadar dunyoda 1,2 milliondan ortiq odam COVID-19 qurboniga aylangan, 32,8 million nafar bemor sog‘aygan.
Kasallar soni bo‘yicha AQSh dunyoda birinchi o‘rinda ketmoqda — 9,8 million. Pandemiya boshlanganidan buyon mamlakatda 237 mingdan ortiq odam koronavirus oqibatida vafot etgan, 3,8 million bemor sog‘aygan.
Ikkinchi o‘rinda Hindiston — mamlakatda 8,5 million kishida koronavirus tasdiqlangan bo‘lib, ularning 126 mingi vafot etgan va 7,8 millioni sog‘aygan.
Undan keyingi o‘rinda Braziliya — koronavirusga chalinganlar soni 5,6 milliondan oshgan, ularning 162 mingi vafot etgan va 5,1 millioni sog‘aygan.
To‘rtinchi o‘rinda 1,7 milliondan ortiq koronavirusga chalinganlar bilan Rossiya ketmoqda. Mamlakatda 30 ming kishi COVID-19 qurboniga aylangan bo‘lsa, 1,3 million bemor sog‘aygan. Rossiyada qatorasiga 3-kun 20 mingdan ortiq kishida COVID-19 aniqlangan.
Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni 41 million, 5-noyabr kuni 48 million kishidan oshgandi.
Izoh (0)