AQSh prezidenti Donald Tramp doirasidagi kishilar uni saylovdagi mag‘lubiyatini tan olishga chaqirgani to‘g‘risidagi xabarlar haqiqatga to‘g‘ri kelmaydi. Bu haqda Oq uy rahbari saylovoldi kampaniyasining maslahatchisi Jeyson Miller ma’lum qildi, deb yozadi “Kommersant”.
Avvalroq CNN telekanali o‘z manbalariga tayanib, bunday qarorga Trampni kuyovi Jared Kushner va rafiqasi Melaniya og‘dirayotganini ma’lum qilgan edi.
“Bu voqea haqiqatga zid. Ba’zi shtatlarda saylov natijalari noaniqligi hamda ovoz berishdagi jiddiy qonun buzilishlari va ba’zi joylarda shaffoflik bo‘lmaganini hisobga olib, Jared Donald Trampga ovoz berishda aniqlikni ta’minlash uchun mavjud barcha huquqiy himoya vositalaridan foydalanishni maslahat berdi”, — deb yozdi Miller o‘z Twitter’ida.
Saylovoldi kampaniyasi maslahatchisi CNN’ning Melaniya Trampning pozitsiyasi haqidagi ma’lumotini ham yolg‘on deb atadi. O‘z navbatida, birinchi xonim Twitter’da saylovlarda ovozlarni haqqoniy hisoblashga chaqiruvchi tvit qoldirdi. “Amerikaliklar haqqoniy saylovlarga munosibdir. Noqonuniy emas, balki qonuniy bo‘lgan har bitta ovoz hisoblanishi kerak. Biz to‘la shaffoflik yordamida demokratiyamizni himoya qilishimiz kerak”, — deb yozdi u.
Eslatib o‘tamiz, AQSh ommaviy axborot vositalari, xususan, Associated Press, CNN, The New York Times, ABC News, Fox News va boshqalar 7-noyabr kuni Jo Baydenni AQShning saylangan prezidenti deb e’lon qildi. Prezident saylovi 3-noyabr kuni o‘tib bo‘lgan, ammo ularning yakuniy natijalari pochta orqali ovoz berilganligi va saylovga rekord darajada ko‘p (avvalgi yillardagidan 15 millionga ko‘p) saylovchilar kelganligi tufayli kechikdi. Bayden prezident saylovida g‘olib chiqish uchun tanlovchilarning kamida 270 ta ovozi kerak bo‘lgan holatda 273 ta ovozni qo‘lga kiritgan.
AQShning amaldagi prezidenti Donald Tramp esa hozircha mag‘lubiyatini tan olishdan bosh tortdi. Tanlovchilar hay’ati prezidentni rasman 14-dekabr kuni saylaydi.
Izoh (0)