Namanganda “Yangi O‘zbekiston – yangicha dunyoqarash” shiori ostida tashkillashtirilgan marafon shahar ko‘chalarida tirbandliklarni yuzaga keltirdi. Yuzaga kelgan tirbandlik suratlari Telegram’dagi “Namanganliklar” kanaliga joylashtirilgan.
Shahar aholisi marafon haftaning dushanba — ish kunida o‘tkazilganidan norozi.
“Shu marafonni dam olish kunlari odamlarga xalaqit qilmaydigan qilib o‘tkazsa bo‘lmaydimi? ‘Navbahor’ stadioni ham bo‘sh yotibdi, o‘sha yerda o‘tkazsa ham bo‘lardi”, — deydi foydalanuvchilardan biri.
Ta’kidlanishicha, yuzaga kelgan tirbandlik sabab tez yordam mashinalari ham harakatlana olmay qolgan.
“Aqlli insonlarning o‘ylab qilgan ishining natijasi bu? Shunchalik darajada ham ahmoqona ish bo‘ladimi?”, — deya noliydi yana bir foydalanuvchi.
Yana bir videoda aytishicha, viloyat hokimi ham tirbandlikda qolib ketgan.
Ma’lumot uchun, Namanganda soat 08:00 dan 11:00 ga qadar tashkil etilgan 3 kilometrlik marafonga Namangan sanoat kolleji oldidan start berilgan. Marafon ishtirokchilari Amir Temur ko‘chasi bo‘ylab, temiryo‘l vokzali, Amir Temur–Alisher Navoiy ko‘chalari kesishmasidagi aylanma harakat, texnopark, “Shodiyona” majmuasi, viloyat jinoyat ishlari sudi binosi, viloyat IIB chorrahasidan chap tomon bo‘ylab Boborahim Mashrab ko‘chasi, 1-maktab va Markaziy bank chorrahalari, Boborahim Mashrab–Istiqlol ko‘chalari kesishmasidan “Uch favvora” xiyoboniga yetib kelgan.
Izoh (0)