Наманганда саломатлик марафони сабаб шаҳар йўлларида катта тирбандликлар юзага келди. Вилоят ҳокимининг автомобили ҳам тирбандликда қолиб кетгани айтилмоқда

Наманганда «Янги Ўзбекистон – янгича дунёқараш» шиори остида ташкиллаштирилган марафон шаҳар кўчаларида тирбандликларни юзага келтирди. Юзага келган тирбандлик суратлари Telegram’даги «Наманганликлар» каналига жойлаштирилган.

Шаҳар аҳолиси марафон ҳафтанинг душанба — иш кунида ўтказилганидан норози.

«Шу марафонни дам олиш кунлари одамларга халақит қилмайдиган қилиб ўтказса бўлмайдими? ‘Навбаҳор’ стадиони ҳам бўш ётибди, ўша ерда ўтказса ҳам бўларди», — дейди фойдаланувчилардан бири.

Таъкидланишича, юзага келган тирбандлик сабаб тез ёрдам машиналари ҳам ҳаракатлана олмай қолган.

«Ақлли инсонларнинг ўйлаб қилган ишининг натижаси бу? Шунчалик даражада ҳам аҳмоқона иш бўладими?», — дея нолийди яна бир фойдаланувчи.

Яна бир видеода айтишича, вилоят ҳокими ҳам тирбандликда қолиб кетган.

Маълумот учун, Наманганда соат 08:00 дан 11:00 га қадар ташкил этилган 3 километрлик марафонга Наманган саноат коллежи олдидан старт берилган. Марафон иштирокчилари Амир Темур кўчаси бўйлаб, темир йўл вокзали, Амир Темур–Алишер Навоий кўчалари кесишмасидаги айланма ҳаракат, технопарк, «Шодиёна» мажмуаси, вилоят жиноят ишлари суди биноси, вилоят ИИБ чорраҳасидан чап томон бўйлаб Бобораҳим Машраб кўчаси, 1-мактаб ва Марказий банк чорраҳалари, Бобораҳим Машраб–Истиқлол кўчалари кесишмасидан «Уч фаввора» хиёбонига етиб келган.