Toshkentdagi Virusologiya ilmiy tekshirish instituti bosh shifokori, tibbiyot fanlari doktori Muhayyo Asilova yarim yil COVID-19 bemorlari orasida yashab kasal bo‘lmasdan, maktabga chiqa boshlagan nevarasidan koronavirus yuqtirib oldi. Bu haqda u “Kun.uz”ga bergan intervyusida so‘zlab bergan.
“Uydan chiqib ketayotganimda nevaram 7 oylik edi. Qaytsam, u bir yoshdan oshgan, ancha katta bo‘lib qolgan. Toshkentda bo‘lsangiz ham uyga borolmaysiz, ularni bag‘ringizga bosolmaysiz. Shu paytgacha hech qachon bunaqa holatga tushmaganmiz.
Lekin biz jamoa bilan astoydil chin yurakdan ishladik. Shaxsan o‘zim ertalab kirib ketardim, soat 16:00 largacha ham qolib ketardim. Bu birinchi tekshiruv edi. Har bir kasalni ko‘rib, ularning tepasida o‘tirib, hammasini ko‘rib chiqardik-da, keyin tushlik qilib, tushlikdan keyin yana soat 18:00 larda kirib ketib, soat 00:00 gacha qolib ketardik.
Albatta, bu ayniqsa yoz paytida qiyin bo‘ldi. Chilla vaqtida kombinezon, niqob, respiratorda, qo‘limizda 2 tadan qo‘lqop bilan qiyin bo‘ldi. Lekin shuni aytishim mumkinki, men karantinda ishlagan shu 6 oy davomida bo‘lganimda menga virus yuqmadi. Sentabr oyiga kelib, nevaram maktabga bora boshlaganda o‘sha yerdan yuqtirib oldi, kelib menga ham yuqtirdi”, — deydi Muhayyo Asilova.
Shuningdek, u mart oyida koronavirus bo‘lgan birinchi kasalning oldiga qanday kirgani, bemorlar ham, shifokorlar ham COVID-19 bo‘yicha tajribaga ega bo‘lmagani sabab qo‘rquvga tushgani to‘g‘risida gapirib bergan.
Asilovaning so‘zlariga ko‘ra, dastlab mart oyida asosiy qiyinchilik tashkiliy masala bo‘lgan. Iyul oyi esa Toshkent shahrida juda og‘ir kelgan.
“Asosiy og‘ir kasallarga kislorod juda ham kerak. Shunaqa paytda Yunusobod hokimiyati tomonidan kislorod nuqtalari ko‘paytirib berildi. Bundan tashqari, homiylar 8 ta nuqtamizni 40 tagacha ko‘paytirib berishdi. Bu esa juda ham kerak edi”, — deydi Virusologiya ilmiy tekshirish instituti bosh shifokori.
Bundan tashqari, u shifokorlar COVID-19’ ga chalingan og‘ir kasallarni, vafot etganlarni ko‘rib, ruhan juda ham ezilgani, u yerdan chiqqandan keyin shifokorning ruhan tiklanishi oson kechmagani haqida gapirgan.
Ta’kidlanishicha, Toshkentda bemorlar soni ancha kamaya boshlagani sabab 1-noyabrdan boshlab Virusologiya ilmiy tekshirish instituti o‘z faoliyatiga qaytgan.
Avvalroq Muhayyo Asilova avgust oyining boshlarida O‘zbekistonda pandemiya boshlanganidan buyon koronavirusga chalinganlarning qayta kasallanishi holatlari kuzatilmaganini ma’lum qilgandi.
Mavzuga doir: O‘zbekistonda koronavirus bilan qayta kasallanish holatlari qayd etilmoqda — SSV huzuridagi shtab
Izoh (0)