Toshkent shahri va Namangan viloyatida yetti nafar notariusning litsenziyasi to‘xtatildi

Toshkent shahri va Namangan viloyati adliya boshqarmalari huzuridagi malaka komissiyalarining tegishli qarorlariga asosan notarius to‘g‘risidagi qonun hujjatlari talablari buzilganligi uchun 7 nafar xususiy amaliyot bilan shug‘ullanuvchi notariuslarning litsenziyalari to‘xtatilgan. Bu haqida Adliya vazirligining Jamoatchilik bilan aloqalar bo‘limi ma’lumotiga tayanib “Kun.uz” xabar bergan.

Jumladan, Toshkent shahrida Mirzo Ulug‘bek tumanida xususiy amaliyot bilan shug‘ullanuvchi notarius Kalandarova Shoxida Atanazarovnaning (litsenziya TN № 0125, 04.05.2020 y.) litsenziyasi 2020-yilning 5-noyabridan 3 oy muddatga;

Mirobod tumanida xususiy amaliyot bilan shug‘ullanuvchi notarius Shodmanova Moxira Furqatovnaning (litsenziya TN № 0113, 29.04.2020 y.) litsenziyasi 2020-yilning 5 noyabridan 3 oy muddatga;

Uchtepa tumanida xususiy amaliyot bilan shug‘ullanuvchi notarius Tashev Xabib Xakimovichning (litsenziya TN № 0060, 23.04.2020 y.) litsenziyasi 2020 yilning 5 noyabridan 1 oy muddatga to‘xtatilgan.

Shuningdek, Namangan viloyati Namangan shahrida xususiy amaliyot bilan shug‘ullanuvchi notarius Raxmanov Xabibullo Nosirovichning (litsenziya NA № 0040, 21.04.2020 y.) litsenziyasi 2020-yilning 6-noyabridan 2 oy 15 kun muddatga;

Uychi tumanida xususiy amaliyot bilan shug‘ullanuvchi notarius Xakimov Alimardon Sobitxojayevichning (litsenziya NA № 0032, 21.04.2020 y.) litsenziyasi 2020-yilning 6-noyabridan 2 oy muddatga;

Pop tumanida xususiy amaliyot bilan shug‘ullanuvchi notarius Azbekova Elnora Murotjonovnaning (litsenziya NA № 0036, 21.04.2020 y.) litsenziyasi 2020-yilning 6-noyabridan 2 oy muddatga;

Namangan shahrida xususiy amaliyot bilan shug‘ullanuvchi notarius Artiqov Abduraxim Abdurashidovichning (litsenziya NA № 0033, 21.04.2020 y.) litsenziyasi 2020-yilning 6-noyabridan 1 oy muddatga to‘xtatilgan.

Ta’kidlanishicha, shu kungacha Andijon, Jizzax, Farg‘ona va Samarqand viloyatlaridagi xususiy amaliyot bilan shug‘ullanuvchi 16 nafar notariusning litsenziyalari to‘xtatilgan. Qayd etilishicha, Adliya vazirligining ma’lumotida litsenziyalarning to‘xtatib turishining sabablari ko‘rsatilmagan.

Notariat to‘g‘risidagi qonunning 15 (2)-moddasiga ko‘ra notarius Notarial palataga a’zolik badallarini bir oydan ortiq muddat davomida to‘lamaganda — uch oygacha, a’zolik badallarini to‘laguniga qadar uning litsenziyasi to‘xtatilishi, shuningdek notarius jinoiy javobgarlikka tortilganda — u ayblanuvchi tariqasida jalb etilgan paytdan e’tiboran va sud hukmi qonuniy kuchga kirguniga qadar yoxud reabilitatsiya qiluvchi asoslarga binoan uni jinoiy javobgarlikdan ozod etish to‘g‘risida qaror qabul qilinguniga qadar, notarius qonun hujjatlarida belgilangan tartibda bedarak yo‘qolgan deb topilganda — bedarak yo‘qolgan deb topish haqidagi qaror sud tomonidan bekor qilinguniga qadar bo‘lgan davrga uning litsenziyasi to‘xtatilishi mumkin.

Qolgan holatlarda litsenziyaning amal qilishini to‘xtatib turish muddati olti oydan oshishi mumkin emas. Litsenziyasining amal qilishi to‘xtatib turilgan shaxs litsenziyaning amal qilishini to‘xtatib turishga olib kelgan holatlarni, agar ular bartaraf etib bo‘lmaydigan xususiyatga ega bo‘lmasa, ko‘rsatilgan muddatda bartaraf etishi shart.