Payariq-Samarqand shahri yo‘nalishida harakatlanuvchi Isuzu rusumli avtobus haydovchisi G’iyosjon O‘roqov boshqaruvidagi avtomobil 2020-yilning 6-noyabr kuni soat taxminan 10:00 atrofida Payariq tumani hududidan o‘tuvchi 4R-48 avtomobil yo‘lining 3-kilometrida avtobusning rul boshqaruvini yo‘qotishi natijasida ag‘darilib, yo‘l-transport hodisasi sodir qilgan. Bu haqida “Daryo”ga Samarqand viloyat IIB axborot xizmati ma’lum qildi.
Natijada avtobusda bo‘lgan taxminan 15 nafar yo‘lovchilardan 3 nafar Q., Sh. va R. turli xildagi tan jarohatlari olib tuman tibbiyot birlashmasiga murojaat qilgan. Jiddiy shikastlangan avtobus jarima maydoniga qo‘yilgan.
Respublika shoshilinch tez tibbiy yordam ilmiy markazi Samarqand filialining telekanalga ma’lum qilishicha, jarohati olib shifoxonaga olib kelinganlarning ikki nafari 16 yoshda. Ularning ahvoli o‘rta og‘ir ekanligi ta’kidlangan.
Holat yuzasidan Payariq tumani IIB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilib, surishtiruv harakatlari olib borilmoqda.
Avvalroq Yunusobodda yuz bergan YTHda voyaga yetmagan haydovchi, Toshkent viloyatida Mercedes va Matiz ishtirokidagi YTHda bir kishi hamda Qamchiq dovonida Nexia Isuzu’ga yetib olishi natijasida 2 kishi halok bo‘lgani haqida xabar berilgandi.
Izoh (0)