Бухоро вилоятида «ВАЗ-21011» машинасини жарима майдонидан чиқариб бериш ва автомобилнинг двигатель рақами ҳақида маълумотнома тайёрлаб бериш эвазига вилоят ИИБ ЙҲХБ инспекторига пора таклиф қилган ҳайдовчи қўлга олинди. Бу ҳақда Бухоро вилояти ИИБ ахборот хизмати хабар қилган.
Хабарда қайд этилишича, 2020 йилнинг 19 октябрь куни Бухоро вилояти Ички ишлар бошқармаси ЙҲХБ инспектори сержант С.Б. вилоят ИИБ ЙҲХБ бошлиғи номига билдирги билан мурожаат қилиб, унда В.С. исмли шахснинг «ВАЗ-21011» машинасини жарима майдонидан чиқариб бериш ҳамда «Автотранспорт воситасини қайд этиш гувоҳномаси»да кўрсатилган двигатель рақами билан автомашина двигателидаги завод рақамлари мос эканлиги ҳақида маълумотнома ёзиб бериши эвазига 400 минг сўм миқдоридаги пулларни пора тариқасида таклиф қилаётгани сабабли унга нисбатан қонуний чора кўришни сўраган.
Сержант С.Б.нинг билдиргиси асосида Ички ишлар вазирлиги Ўз хавфсизлиги бошқармаси Бухоро вилояти бўйича бўлими ва Бухоро вилояти прокуратураси ходимлари томонидан ўтказилган тезкор тадбирда фуқаро В.С. сержант С.Б.нинг хизмат хонасига келиб, 400 минг сўмни пора сифатида берган вақтида ушланган. Ушбу ҳолат тегишли тартибда расмийлаштирилган.
Ҳолат юзасидан Жиноят кодексининг 211-моддаси 1-қисми (пора бериш) билан жиноят иши қўзғатилиб, ҳозирда В.С.га нисбатан дастлабки тергов ҳаракатлари олиб борилмоқда, дейилади хабарда.
Аввал Тошкент вилоятида ЙПХ командирига 350 доллар пора таклиф қилган шахс қўлга олингани, Самарқандда Malibu’сини жарима майдончасидан чиқариб бериш учун ИИБ ходимига 400 доллар таклиф қилган ҳайдовчи ушлангани, Шаҳрисабзда машинасини жарима майдонидан чиқариш учун туман ЙҲХБ бошлиғига пора бераётган фуқаро қўлга тушгани ҳақида хабарлар берилган.
Изоҳ (0)