O‘zbekiston bosh prokurori Nig‘matilla Yo‘ldoshev raisligida korrupsiya holatlari kuzatilayotgan sohalar hamda vazirlik va idoralarda buning sabab va shart-sharoitlariga bag‘ishlangan idoralararo yig‘ilish bo‘lib o‘tdi.
Yig‘ilishda oliy ta’lim tizimida ham korrupsiyani keltirib chiqaruvchi omillar to‘liq bartaraf etilmaganligi ham ko‘rsatib o‘tildi.
Qayd etilishicha, 2020-yilning o‘tgan 9 oyda tizimdagi 70 nafar xodimlar ta’lim jarayoni bilan bog‘liq jinoyatlarni sodir qilgan. Tizimda eng ko‘p kuzatilayotgan korrupsiya o‘qishga kiritish masalasi bilan bog‘liq bo‘lib qolmoqda.
Nostrifikatsiya jarayonida korrupsiyaviy omillar tanqid ostiga olindi.
2020-yilda Vazirlar Mahkamasi huzuridagi Ta’lim sifatini nazorat qilish davlat inspeksiyasi boshlig‘ining yordamchisi Shukurov sheriklari orqali 4 nafar fuqarodan xorijiy diplomlarni nostrifikatsiya qilib berish evaziga jami 6500 dollar olganda ushlangan. Hozirda ular sud oldida javob bermoqda.
Shuningdek, Ta’lim sifatini nazorat qilishga mas’ul idoraga xorijiy diplomni nostrifikatsiya qilish, ya’ni boshqaruv idorasi funksiyasining berilishi korrupsiyaning oldini olish imkonini cheklashi ta’kidlandi.
Avvalroq bosh prokuror o‘tgan ikki yilda moliya organlarining 41 nafar xodimi korrupsiya holatlari uchun jinoiy javobgarlikka tortilgani, “Xalq banki” sobiq rahbari tuzgan jinoiy guruh aniqlangani, Arnasoy, Yunusobod, Buvayda hokimlari o‘rinbosarlari yer ajratib berish evaziga pora olgani va To‘raqo‘rg‘on bandlikka ko‘maklashish markazi direktori pandemiya davrida 325,5 million so‘m mablag‘ni talon-toroj qilgani haqida ma’lum qilgandi.
Izoh (0)